झन् कडा कार्यक्रम वइ: प्रचण्ड
येँ (सन्ध्या टाइम्स)/थःपिनि आन्दोलनयात संवोधन मयात धाःसा केन्द्रीय समितिया बैठकं आम हडतालया ज्याझ्वः हयेगु ख्याच्वः माओवादी अध्यक्ष प्रचण्डं बियादीगु दु ।
आन्दोलनय् ब्वति कायेत गोरखां वःगु गाडी दुर्घटनाय् लानाः घाःपाः जूपिं कार्यकर्तातय्त जनमैत्री अस्पतालय् नापलासें वय्कलं उगु खँ धयादीगु खः ।
सहमतिया निंतिं थःपिं तयार दुगु खँ कनादिसें वय्कलं न्ह्यःने धयादी, 'थौं सुथय् नं एमालेया पासापिंलिसे सहलह जूगु दु।'
म्हिगःया घटनाय् सुरक्षाकर्मी व थःपिनि कार्यकर्तापाखें छुं कमजोरी जूगु खँ धयादिसें वय्कलं थौंया आन्दोलन शान्तिपूर्ण जुइगु खँ धयादिल ।
प्रधानसेनापति प्रकरणय् राष्ट्रपतिं ल्ह्वंगु पलाः भिंकेगु ज्या मयाःतले राष्ट्रिय सरकार दयेकेगु आधार तयार मजुइगु खँ नं माओवादी अध्यक्ष प्रचण्डं धयादीगु दु ।
थ्वहे झ्वलय् माओवादी प्रवक्ता दिनानाथ शर्मां सरकारं अनावश्यक रुपं दमन यात धाःसा उकिया परिणाम गम्भीर जुइगु ख्याच्वः बियादीगु दु। वय्कलं सरकार मुठभेदया रणनीति दयेकाच्वंगु द्वपं बियादिसें थःपिं शान्तिपूर्ण आन्दोलनप्रति प्रतिवद्ध दुगु खँ नं कनादिल ।
