'नेवाःतय् भूमि दान याये दइ मखु'

येँ (सन्ध्या टाइम्स)/ मनमोहन मेमोरियल सामुदायिक अस्पताल व जनमैत्री अस्पतालयात नेवाः राज्य दुनेया थीथी थासय् च्वंगु सार्वजनिक जग्गा दान यात धकाः पिहां वयाच्वंगु समाचारयात कयाः नेपाः राष्ट्रिय पार्टीं विरोध याःगु दु ।

नेवाः राज्य दुने च्वंगु फुक्कं भूमिइ थन हे च्वनीपिं नेवाः लगायत खस्-क्षेत्री व मेमेपिं आदिवासीतय् सार्वभौम अधिकार दइगु जूगुलिं थनया भूमि थुमिगु स्वीकृति बिनाः सुनां नं सुयातं छुं नं त्वहः चिनाः बी दइ मखु धकाः नं पार्टीं सचेत याःगु दु ।

पार्टीपाखें थन पिकाःगु वक्तव्यय् भूमि धइगु हे प्रस्तावित नेवाः राज्यया मुख्य श्रोत खः उकिं थुकियात लाथेपाथे वितरण यायेगु धइगु संघीय व्यवस्थाया विरोधी व नेवाः राज्ययात कमजोर यायेगु ज्या खः धासें अथे मयायेत सम्बन्धित सकसितं सचेत यानातःगु दु। मनमोहन मेमोरियल अस्पतालयात आः नकतिनि यलया ५०० रोपनी भूमि दान याःगु समाचार पिहां वःगु खः ।

देय् दबूया विरोध

येँ (सन्ध्या टाइम्स)/ताम्सालिङ स्वायत्त प्रदेश घोषणा यायेगु ज्याय् तामाङतय्सं नेवाः प्रदेशया लागाय् नं थीगु कथंया ज्या याःगुलिं नेवाः देय् दबुलिं विरोध याःगु दु। थथे निगू जाति दथुइ कचवं पिहां वइगु ज्यां संघीयता विरोधीतय्त जक लबः दइगु जूगुलिं थज्याःगु विवादयात संवादया माध्यमं ज्यंकेत नं देय् दबूया नायः नरेश ताम्राकारपाखें पिथंगु वक्तव्यय् धयातःगु दु। वंगु कार्तिक २१ गते ताम्सालिङ प्रदेश घोषणा जूगु खः ।