संसद बहिष्कार याकनं दिकेमाः

सरकारं थःपिनि माग पूरा मयाः धासें प्रमुख प्रतिपक्षी नेपाली कांग्रेसं संसद बहिष्कार यानाः विरोध प्रकट यानाच्वंगु दु । कांग्रेसया थ्व ज्यां यानाः संसदया कारवाही अवरुद्ध जुयाच्वंगु दुसा उकिया लिच्वः कथं मेखे संविधान दयेकेगु ज्या नं प्रभावित जू वनाच्वंगु दु । यदि कांग्रेसया विरोध थुकथं हे न्ह्याः वनाच्वन धाःसा उकिं देय्यात न्ह्यःने न्ह्याकेगु लँपुइ अझ अवरोध पिकया बीगु खतरा दु ।

सरकार समक्ष कांग्रेसं गुगु ९ बुँदाया माग न्ह्यब्वयातःगु खः व स्वयम् कांग्रेसया हे सरकार दुगु खःसां नं तुरुन्त पूवंके फइ मखु । यदि उकियात कयाःसंसद बहिष्कार यानाच्वन धाःसा उकिं सरकार जक मखु मुक्कं देय्या हे प्रगतिया लँपु अवरुद्ध जू वनी । कांग्रेसया संसद बहिष्कारं यानाः यदि संविधान दयेकेगु ज्याय् पंगः जू वन धाःसा उकिया लिच्वः सरकारयात जक मखु देय्यात हे लाः वनी । यदि इलय् संविधान दयेके मफुत धाःसा उकिं देशय् गज्याःगु भयावह अवस्था सिर्जना याइ धइगु खँ कांग्रेसं मसिउगु खइ मखु । कांग्रेस थ्व देय्या जिम्मेवार व परिपक्व पार्टी खः । थुगुसीया चुनावय् थ्वं बहुमत हये मफुगु खःसां थ्वयागु निर्णय क्षमताय् जनताया विश्वास अझं कायम दनि । उकिं कांग्रेसं छुं नं पलाः ल्ह्वनेबलय् उकथं ल्ह्वनेमाः गुकिं क्षति म्हो जक जुयाः उपलब्धी अप्वः जू वनेमा । मेखे सरकारं नं कांग्रेसं संसद बहिष्कार याःसा थया धकाः वयात बेवास्ता यायेगु पाय्छि मखु । संविधान दयेकेगु ज्याय् कांग्रेसया ग्वाहालि मदयेकं मगाः धइगु खँ सत्तारुढ पार्टीतय्सं मसिउगु खइ मखु । उकिं वार्ता यानाः थुकियात याकनं ज्यंकेगु कुतः यायेमाः ।

More Stories Like this