कोइरालायात शनिवाः सिंगापुर यंकीगु

हिइलय् अक्सिजनया मात्रा म्हो जुया बिरामी जुयादीम्ह नेपाली कांग्रेसया सभापति गिरिजाप्रसाद कोइरालायात थप वासः याकेगु निंतिं शनिवाः सिंगापुर यंकीगु जूगु दु ।

उसाँय् मदया शहिद गंगालाल अस्पतलाय् वंगु मंगलवाः निसें भर्ना जुयादिम्ह कोइरालाया स्वास्थ् अवस्थाय् क्रमिक सुधार जुयाच्वंगुलिं थप वासः याकेत वयेकयात शनिवाः सिंगापुर पाखे यंकेत्यंगु खः । थ्वस्वया न्ह्य वंगु बुधवाः हे सिंगापुर यंकेगु ज्याझ्वः दुगु खसां नं वयेकया स्वास्थ्य अवस्था गम्भीर जूगुलिं सिंगापुर यंकेगु ज्या स्थगित याःगु खः ।

कोइरालायात वासः यानाच्वंपिं डाक्टरतय् कथं वयेकया स्वास्थ्य सुधारोन्मुख जुसां अझ नं खतरामुक्त मजूनिगु खँ धाःगु दु ।