शीर्ष नेतातय् बैठक अलपत्र
येँ (सन्ध्या टाइम्स)/सरकारं पेश याःगु बजेट पारित याकेगु ई आः छवाः हे मदयेधुंकल, थुकिया निकास पिकायेगु लागिं स्वंगू तःधंगु पार्टीया शीर्ष नेतातय् बैठक च्वनेगु धकाः जुयाच्वंगु कुतः आः अलपत्रय् लाः वंगु दु। उकुन्हु तक एमाले अध्यक्ष झलनाथ खनाल भारत वनाच्वंगुलिं वय्कः लिहां वयेवं थ्व बैठक च्वनी धाःगु खःसां वय्कः नेपाः लिथ्यंबलय् कांग्रेस सभापति गिरिजाप्रसाद कोइराला अस्पताल भर्ना जुयादीगुलिं बैठक झन् हे अन्यौलय् लाः वंगु दु। उकुन्हु कोइरालायात सिंगापुर यंकी धाःगुलिं बैठक अनिश्चित जूगु खःसा आः कोइराला गबलय् स्वस्थ जुइ अबलय् जक बैठक च्वनीगु खँ धाःगु दु ।
उकुन्हु तक प्रधानमन्त्री माधव नेपाल रोम वनीगु धाःगुलिं बैठक अन्यौल जुइगु अवस्था वःगु खःसा आः प्रम नेपालं रोम वनेगु ज्याझ्वः नं रद्द यानादीगु दु ।
स्वंगू पार्टीया शीर्ष नेतात नापं मच्वंकं वर्तमान समस्याया निकास पिहां मवइगु जुयाच्वंगु दुसा यदि निकास पिहां मवल धाःसा गथे यानाः बजेट पारित यायेगु धकाः सरकारं विकल्प माला च्वनेधुंकूगु खँ धाःगु दु। सरकारं ध्वनिमतं बजेट पारित यायेगु व मफुत धाःसा अध्यादेशं पारित यायेगु बिचाः यानाच्वंगु दु ।
