फोरम हानं कुचा जुइन
येँ (सन्ध्या टाइम्स)/सरकारय् वनेगु लाकि मवनेगु धइगु खँय् विवाद जुयाः छक्वः विभाजन जूगु मधेशी जनअधिकार फोरम आः हानं विभाजनया स्थितिइ थ्यंगु खँ सीदुगु दु। उगु पार्टीयात सरकारय् दुहां वा धकाः सत्तारुढ पार्टीतय्सं आह्वान यायेवं सरकारय् वनेगु लाकि मवनेगु धइगु खँय् पार्टी दुने मतभेद पिहां वःगु खः ।
सूत्रया कथं पार्टी अध्यक्ष उपेन्द्र यादव अझ नं सरकारय् वने मजिउनि धइगु पक्षय् दुसा अन दुने च्वंपिं सभासद्त धाःसा सरकारय् वने हे माः धइगु पक्षय् वनाच्वंगु दु। यदि पार्टीं थुकी तुरुन्त निर्णय मयात धाःसा यादवया फोरम हानं छक्वः विभाजन जुइगु स्थिति वयेफुगु खँ सूत्रं धाःगु दु ।
एमालेपाखें फोरमयात सरकारय् दुहां वा धकाः याःगु आह्वानया लिसलय् फोरमं वरिष्ठ उपप्रधानमन्त्री पद बीगु खःसा वयेगु धयाछ्वःगु दुसा उकियात लोकतान्त्रिक फोरमं अस्वीकार याःगु खः ।
