अवैध फि खानी बन्द याइगु
ख्वप (सन्ध्या टाइम्स)/ ख्वप जिल्लाय् अवैध रुपं चायेकातःगु थीथी थासय् च्वंगु फि खानी व मनोहराया निषेधित लागाय् न्ह्यानाच्वंगु फिया तस्कर पनेगु निंतिं सर्वदलीय बैठकं ठोस पहल यायेगु क्वःछिउगु दु। ख्वपया स्थानीय विकास अधिकारी प्रभा पाण्डेया अध्यक्षताय् थीथी राजनीतिक पार्टीया नेता, ख्वपया प्रमुख जिल्ला अधिकारी, एसपी, पत्रकार महासंघया प्रतिनिधि व बुद्धिजीवित दुथ्याःगु सर्वदलीय बैठकं अवैध फि खानीयात बन्द यायेगु खँ क्वःछिउगु खः ।
बैठकं फि तस्कर नियन्त्रण यायेत स्थानीय विकास अधिकारीया अध्यक्षताय् सहायक प्रमुख जिल्ला अधिकारी, महानगरीय प्रहरी प्रभागया प्रहरी निरीक्षक, पत्रकार महासंघ व राजनीतिक दलया प्रतिनिधिपिं दुथ्याःगु अनुगमन पुचः नीस्वंगु दु। बैठकं फि खुया मीत यंकाच्वंगु गाडी जक ज्वनेगु यानाच्वंगुलि आः अवैद्य खानीया सञ्चालक, अवैध खानी चले यायेत जग्गा बियातःम्ह जग्गाधनी व फि तस्करतय्त नं ज्वनेगु क्वःछिउगु दु ।
नापं फि खुइगु ज्या नियन्त्रण यायेगु निंतिं स्वीकृति बियातःगु खानीइ होलिङ्ग वोर्ड तयेकाः चार किल्ला, खानी सञ्चालक नापं थीथी जानाकारी बीगु व सुथय् ६ बजेनिसें बहनी ६ बजे तक जक फि लिकाये दइगु व्यवस्था यायेगु नं क्वःछिउगु दु ।
बैठक लिपा दुवाकोट लागाय् अवैध रुपं चले यानातःगु व वंगु निवाः न्ह्यः न्याम्ह मनू सीगु कथं दुर्घटना जूगु फि खानीया अनुगमन याःगु जानकारी नेमकिपा प्रतिनिधि रमेश श्रेष्ठ बियादिल ।
