नेप्से कुहां वनेगु क्रम जारी
येँ (सन्ध्या टाइम्स)/स्टक एक्सचेन्जया शेयर कारोबारं म्हिगः नं नेप्से परिसुचक कुहां वंगु दु। नेप्से जक मखसे शेयर व दांया कारोबार नं छन्हु न्ह्यःया तुलनाय् गाक्कं कुहां वंगु दु। कारो-बारया निंतिं बजाः चालेवं हे नेप्से कुहां वनेगु शुरु जूगु खः। कारोबारया घौछि लिपा थहां वनेधुंकूगु नेप्से वयां लिपा धाःसा हाकनं कुहां वन ।
स्टक एक्चेन्जय् जूगु शेयर कारोबारं छन्हु न्ह्यःया कारोबारय् थें हे म्हिगःनं कारोबार जूगु दक्वं समुहया परिसुचक व उपसुचक कुहां वंगु दु। शुरुंनिसें हे अन्त तकं कुहां वनेगु क्रमं निरन्तरता कायेवं छन्हु न्ह्यः तुलनाय् म्हिगःया कारोबारय् झण्डै १ अंकं बढे जुयाः ३ दशमलव ४३ अंकं कुहां वनाः ५७६ दशमलव ८ अंकय् थ्यंगु दु। सेन्सेटिभया सुचक १ दशमलव १८ अंकं कुहां वंगु दु। फ्लोट शुन्य दशमलव ४२ अंकं कुहां वन ।
स्टक एक्चेन्जय् जूगु शेयर कारोबारय् म्हिगः नं बछि धइथें वाणिज्य बैंकया शेयर भाः कुहां वंगु दु। कुहां वंगु मध्ये दकलय् अप्वः वाणिज्य समुहलय् प्रभाव लाकीगु नविलया शेयरय् ५०/-, लक्ष्मी बैंकया शेयरय् ४९/-, एभरेष्टया शेयरय् ३७/- व बीओकेया शेयरय् ३५/- तका दां कुहां वनेवं उपसुचक नं ४ दशमलव ४२ अंकं कुहां वनाः ५५८ दशमलव २७ अंकय् थ्यन। विकास बैंक समुहया सुचक ५ दशमलव २ अंकं कुहां वयाः ६३१ दशमलव ४७ अंकय् थ्यंगु दु ।
दकलय् अप्वः जलविद्युत समुह ८ दशमलव ८२ अंकं कुहां वनाः ८११ दशमलव ३८ अंकय् थ्यन। फाइनान्स समुह १ दशमलव ४८ अंकं कुहां वयेवं ६०२ दशमलव ७ अंकय् थ्यंगु दुसा वीमा समुह शुन्य दशमलव २५ अंकं कुहां वनाः ६०२ दशमलव ५४ अंकय् थ्यन ।
ख्वीप्यंगू कम्पनीया शेयर कारोबार जूगुली स्वीस्वंगू कम्पनया भाः कुहां वंगु दुसा झिंगुंगू कम्पनीया जक शेयर भाः थहां वंगु दु। ल्यं झिंनिगू कम्पनीया शेयर भावय् धाःसा छुं हिउपाः वःगु मदु। छन्हु न्ह्यःया तुलनाय् म्हिगः कारोबार नं कुहां वयेवं मुक्कं न्हय्खुद्वः व गुसः व स्वीच्यागू कित्ता शेयर न्याये-मी जुयाः प्यंगू करोड नीगू लाख चय्न्याद्वः तका दांया कारोबार जुल। छन्हु न्ह्यः न्यय्गुंगू कम्पनीया छगू लाख स्वद्वः व खुसः व न्हय्च्यागू कित्ता शेयरं खुगू करोड छगू लाख पीन्हय्द्वः तका दांया कारोबार जूगु खः ।
प्राइम कमर्सियल बैंक दांया ल्याखं दकलय् अप्वः न्यय्गुंगू लाख स्वीखुद्व्क तका दांया कारोबार याःगु दु। जनरल फाइनान्सं अप्वः कमे याःगु दुसा लक्ष्मी बैंकं दकलय् अप्वः द्यापं फयेमाःगु दु। भिवोर विकास बैंकया दकलय् अप्वः १०,२०० कित्ता शेयर कारोबार जुल ।
