माओवादी पाखें सिंहदरवार घेराउ

प्रदर्शनकारी व सुरक्षाकर्मीत दथुइ ल्वापू, पीम्ह घाःपाः

नागरिक सर्वोच्चताया माग यासें आन्दोलनय् कुहांवःगु एकीकृत नेकपा (माओवादीं) निक्वःगु चरणया आन्दोलनया लिप्पांगु ज्याझ्वः कथं बिहीवाः सिंहदरवार घेराउ याःगु दु । आन्दोलन शान्तिपूर्ण जुसां सिंहदरवारया दक्षिण लुखाय् प्रदर्शनकारी व सुरक्षाकर्मीत दथुइ छझा ल्वापू जूगु खः ।

सुरक्षाकर्मीतय्सं धां कथं माओवादी कार्यकर्तात निषेधित क्षेत्र दुने दुहांवयेगु कुतः याःगुलिं बल छ्यलेमाःगु ख: । उखे माओवादी कार्यकर्तातय्सं धा:सा शान्तिपूर्ण आन्दोलनयात उत्तेजित यायेत प्रहरीं लाठीचार्ज याःगु खँ धाःगु दु । प्रहरीया लाठीचार्जया कारणं माओवादी नेता अमिक शेरचण, वर्षमान पुन 'अनन्त' लगायत पीम्ह घाःपाः जूगु दु । घाःपाः जूपिंत न्हू बानेश्वरय् च्वंगु एभरेष्ट नरसिंङ होम लगायत थीथी अस्पतालय् वासः याकातःगु दु ।


सुथय् च्याताः ईलं निसें घेराउ ज्याझ्वः सुरु यायेगु धाःसां माओवादी कार्यकर्तातय्सं निर्धारित ई स्वयां न्ह्यः हे सिंहदरवार घेराउ याःगु दु । माओवादीया शीर्ष नेतातय् नेतृत्वय् माओवादी कार्यकर्तातय्सं च्यागू थासं सिंहदरवार घेराउ याःगु दु ।

माओवादी अध्यक्ष पुष्पकमल दाहाल 'प्रचण्डं' मसाल च्याकाः घेराउ ज्याझ्वः न्ह्याकादीगु खः । वयेकलं अन कार्यकर्तातय्त आन्दोलन पूर्ण रुपं सफल यायेत व संयमित जुइत निर्देशन बियादीगु खः । नापं वयेकलं थ्व आन्दोलनं नागरिक सर्वोच्चता कायम मजूसाः मेगू चरणय् थ्वस्वयां तःच्वःगु आन्दोलया ज्याझ्वः क्वछीइगु ख्याच्वः नं बियादीगु खः ।

अध्यक्ष प्रचण्ड नापं वरिष्ठ उपाध्यक्ष मोहन वैद्य 'किरण', महासचिव रामबहादुर थापा 'बादलं' भद्रकाली पाखें घेराउया नेतृत्व यानादीगु खः । अथेहे माओवादी पाखें गठित राष्ट्रिय जनआन्दोलन समिति नेपालया संयोजक नापं माओवादी उपाध्यक्ष डा. बाबुराम भट्टराई, सचिव पोष्टबहादुर बोगटी, नेता झक्कुसुवेदीं माइतीघर मण्डालाय् च्वनाः घेराउ ज्याझ्वःया नेतृत्व यानादीगु खः ।

मेम्ह उपाध्यक्ष नारायणकाजी श्रेष्ठ 'प्रकाश' सचिव सिपि गजुरेलं पद्मोदय मोड, स्थायी समिति दुजाः कृष्णबहादुर महरा, लिलामणी पाखरेलं सिडियो ज्याकू, स्थायी समिति दुजः अमिक शेरचन, वर्षमान पुन 'अनन्त', पम्फा भुषालं सतक विभाग, देव गुरुङ, टोपबहादुर रायमाझीं हनुमानस्थान पाखें नेतृत्व यानादीगु खः ।

अथेहे अनामनगर घट्टेकुलोय् स्थायी समिति दुजः नेत्रविक्रम चन्द 'विप्लव', प्रवत्ता दिनानाथ शर्मा व कालिकास्थान बाँसघारीं स्थायी समिति दुजः गिरिराजमणी पोखरेल, हिसिला यमी, कृष्णदास श्रेष्ठं नेतृत्व यानादीगु खः ।

द्वलंद्वया ल्याखय् दुपिं माओवादी कार्यकर्तातय्सं म्ये हालाः, प्याखँ ल्हूया, कविता वाचन यानाः सिंहदरवार घेराउ याःगु खः । सरकारं माओवादीया सिंहदरवार घेराउ ज्याझ्वःयात मध्यनजर यानाः ब्यापक सुरक्षाकर्मीत परिचालन याःगु खः । नेपाल प्रहरी व सशस्त्र प्रहरीं थःथःगु घेरा दयेकाः सुरक्षा ब्यूगु खः ।