'राष्ट्रपतिया पलाः मेगू माघ १९या निंतिं'
एकीकृत नेकपा (माओवादी)या उपाध्यक्ष डा. बाबुराम भट्टराईं राष्ट्रपति डा. रामवरण यादवं बहुमत प्राप्त सरकारया निर्णय विरुद्ध पलाः ल्ह्वनाः मेगू माघ १९ यायेत्यंगु द्वपं बियादीगु दु ।
बुधवाः येँय् रिपोटर्स क्लबं याःगु ज्याझ्वलय् न्ववानादिसें वयेकलं पुलांम्ह जुजुं गुकथं सत्ता पूर्ण रुपं थःगु ल्हातय् कायेत असोज १८या बः कयाः माघ १९या घटना यात अथेतुं हे राष्ट्रपतिं नं प्रत्यक्ष राष्ट्रपतिय शासन लागू यायेत वैशाष २०य् नाटकीय ढंगं पलाः ल्ह्वंगु धयादिल ।
वयेकलं राष्ट्रपतिया वैशाष २०या पलाः मिभंकूसाः मेगू माघ १९ जुइगु दाबी यानादिल । माओवादीं न्ह्याकूगु आन्दोलन हानं माघ १९या घटना दोहोरे जुइमबीत जूगु धयादिसें वयेकलं सेनाया वलय् राष्ट्रपतिय शासन लागू यायेगु कुतः जुयाच्वंगु धयादिल ।
माओवादी पाखें गठित संयुक्त जनआन्दोलन समिति नेपालया संयोजक नं जुयादिम्ह भट्टराईं राष्ट्रपतिया पलाः बारे संसदय् सहलह जुइदयेमाः धयादिल । वयेकलं माओवादीं यानाच्वंगु आन्दोलन राजनीतिक गतिरोध ज्यंकेगु निंतिं जूगु दाबी यानादिल ।
माओवादीं यायेत्यंगु सिंहदरवार घेराउ ज्याझ्वलय् न्यागू लख मनूतय्सं ब्वति काइगु दाबी यानादिसें शान्तिपूर्ण आन्दोलनय् सरकारं दमन यासाः उकीया जिम्मेदार सरकार स्वम्म जुइमालीगु ख्याच्वः नं बियादिल । वयेकलं सरकारं अलोकतन्त्रिक ढगं निषेधित क्षेत्र अप्वयेकूगु धयादिसें उकीयात माओवादीं माने मयायेगु धयादिल ।
