प्रचण्ड व खनालं कोइराला नापलात

कोइरालाया स्वास्थ्य अवस्था सुधारोन्मुख

बिरामी जुयाः अस्पतालय् वासः याकाच्वनादिम्ह नेपाली कांग्रेसया सभापति गिरिजाप्रसाद कोइरालायात नापलायेत एनेकपा (माओवादी)या अध्यक्ष पुष्पकमल दाहाल 'प्रचण्ड', नेकपा (एमाले)या अध्यक्ष झलनाथ खनाल, गृहमन्त्री भीम रावल लगायत सरकारी अधिकारी व नेतात बुधवाः शहिद गंगालाल हृदय केन्द्र बाँसबारी थ्यंकादीगु दु ।

बुधवाः सुथय् अस्पताल वनाः माओवादी अध्यक्षं कोइरालाया स्वास्थ्य अवस्था बारे जानकारी कयादीगु खः । वयेकलं कोइराला नापलायेधुंकाः कोइरालाया स्वास्थ्य सुधार जुयाच्वंगु खँ कनादिल । अथेहे वयेकलं कोइरालाया अवस्था ठीक जुइधुंकाः राजनीतिक अवस्था बारे सहलह जुइगु धयादिल ।

हिइ अक्सिजनया मात्रा म्हो जुया बिरामी जुयादिम्ह कोइरालाया अवस्था बारे जानकारी कायेत गृहमन्त्री भीम राउलं नं सुथय् हे अस्पताल थ्यंकादीगु खः ।

अथेहे भारत भ्रमण क्वचायेकाः थौं तिनि येँ थ्यंकादिम्ह एमाले अध्यक्ष खनालं नं बुधवाः न्हिनय् अस्पताल वनाः कोइरालायात नापलानादीगु दु । कोइराला नापलये धुंकाः वयेकलं कोइरालाया अवस्थाय् सुधार जुयाच्वंगु कनादिल । वयेकलं कोइरालाया धापू उद्धृत यानादिसें धयादिल, - 'जि छन्हू निन्हू दुने हे ठीक जुइ, अलेः छि, जि व प्रचण्डजी च्वनाः राजनीतिक गतिरोधया बारे सहलह यायेमाः ।'

थ्वहे दथुइ कोइरालायात वासः वनाच्वंपिं डाक्टरतय्सं कोइरालाया स्वास्थ्य अवस्था सुधारोन्मुख जूगु खँ धाःगु दु । डाक्टरतय् कथं कोइरालायात बियातःगु अक्सिजनया मात्रा कम याःगु व वयेकलं सामान्य खँल्हाबंला यायेफुगु खँ धाःगु दु । नापं कोइरालयात आः ज्वार नं मवःगु खँ धाःगु दु ।

मन्त्रिपरिषदया बैठक स्थगित

उसाँय् मदुगु कांग्रेस सभापति कोइरालाया स्वास्थ्य अवस्थायात प्रमुख एजेण्डा दयेकाः जुइत्यंगु मन्त्रिपरिषदया बैठक बुधवाः कोइरालाया रिपोर्ट मवयेवं स्थगित जूगु दु ।

न्हिनय् छताः ईलय् च्वनेगु धाःगु बैठक प्रधानमन्त्री माधवकुमार नेपाल उसाँय् मदया सनिलय् खुताः ईलय् च्वनेगु निर्णय याःगु खःसां उबलय् तक नं कोइरालाया रिपोर्ट मवयेवं कन्हय् तकया निंतिं मन्त्रिपरिषदया बैठक स्थगित याःगु खः ।