तयार जुल नेवाःतय् मंकाः ध्वाँय्
येँ (सन्ध्या टाइम्स)/ नेवाःतय् हरेक ज्याझ्वलय् नेवाः एकताया चिं कथं ब्वयेकेत मंकाः नेवाः ध्वाँय् तयार जूगु दु। नेवाः स्वायत्त राज्य मंकाः संघर्ष समितिया पहलय् उगु ध्वाँय् तयार याःगु खः ।
आः तयार याःगु थ्व ध्वाँय्या ब्या व हाकः १: १.५या अनुपातय् जुइ। ध्वाँय्या पृष्ठभूमिया रङ्ग अले थुकी दुथ्याकातःगु थीथी चिंपाखें नेवाःतय्गु सांस्कृतिक व राजनीतिक संकेत बी ।
ध्वाँय्या पृष्ठभूमि ह्याउँगु रंगया जुइ। थुकियात न्हूगु सुथया निभाः, युगान्तकारी हिउपाः, अग्रगमन, प्रगति उन्मुख, आशाया चिं व नेवाःतय्सं न्ह्यागुनं अवसरय् शुभया संकेत कथं नालीगु आस्थाया प्रतीक खः ।
दथुइ लाक्क ध्वाँय्या ब्याया बच्छि हाकःगु ब्यासया तुयूगु पलेस्वांया च्याहः व उकी दुने ह्याउँगु छचाः अले दथुइ ध्वाँय्या च्वय्पाखे च्वका लूगु म्हासुगु नगु च्वनी ।
तुयूगु पलेस्वांया चाहः (अष्ट दल) नेवाःतय् न्ह्यागुं भिंज्या न्ह्याकेत न्ह्यःने ब्वइगु सांस्कृतिक प्रतिक अष्टमङ्गल शाक्त परम्परा कथं अष्टमातृका, बौद्ध परम्परा कथं आर्य अष्टाङ्ग मार्ग, सकल नेवाःया मंकाः सांस्कृतिक पर्व कथं नाला वयाच्वंगु म्हपुजाय् बौद्ध, हिन्दू व मेमेपिं सकलसिनं मन्दःया रुपय् छ्यलीगु आकृति पलेस्वांया च्याहः खः ।
च्वय्पाखे च्वका लूगु म्हासुगु नगु नेपाःया न्हूगु राज्य पुनर्संरचनाया झ्वलय् देय्या राजनीतिक सर्गतय् नेवाः स्वायत्त राज्यया रुपय् लुयावःगु राजनीतिक शक्तिया प्रतिक ख: ।
म्हासुगु नगुया जःखः ह्याउँगु चाकः नेवाःयात एकताय् माः हनातयेगु सूत्र प्रतिवद्धताया प्रतिक खः ।
वइगु पुस ११ गते जुइगु नेवाः स्वायत्त गणराज्य घोषणा कुन्हु थ्व ध्वाँय् पित बीगु ज्याझ्वः दु। खुल्ला धेंधेंबल्लाःपाखें कलाकार रामकृष्ण नकर्मीं थ्व ध्वाँय् तयार यानादीगु खः ।
