गुल्मीइ ज्ञानमाला नवजागरण ज्याझ्वः
येँ (सन्ध्या टाइम्स)/बुद्धया उपदेशकथं बौद्धपहयात जनजीवनय् छ्यलेया निंतिं राष्ट्रिय ज्ञानमाला समितिं सञ्चालन याना वयाच्वंगु ज्याझ्वः कथं ज्ञानमाला नवजागरण अभियानया न्हापांगु ज्याझ्वः पश्चिमया गुल्मी जिल्लाया रिडीस्थित सुगन्धविहारय् जूगु दु ।
वंगु कार्तिक २१ गते गुल्मीया रिडी सुगन्ध विहारय् नेपाल राष्ट्रिय ज्ञानमाला समितिया नायः प्रा. सुवर्ण शाक्यया अध्यक्षताय् जूगु उगु ज्याझ्वलय् सल्लाहकार प्रमुख शान्तरत्न शाक्यं लसुकुस यानादीगु खःसा नायः प्रा. सुवर्ण शाक्यं ज्ञानमाला नवजागरणया उद्देश्य बारे कनादिल ।
समितिया महासचिव अमीरमान शाक्य व सुगन्ध विहारया नायः सुवर्ण कक्षपतिं नवजारण अभियानया विषयय् न्ववानादिल। समितिया वरिष्ठ उपाध्यक्ष किरण कुमार जोशीं सुभाय् देछानादिल ।
उगु ज्याझ्वलय् बोधिमत च्याकाः शिल प्रार्थना, मंकाः बुद्धपुजा जुलसा राष्ट्रिय ज्ञानमाला समितिया नायःपाखें ज्ञानमाला सफू व सल्लाहकार प्रमुखपाखें बुद्ध मूर्ति व पोष्टर सुगन्ध विहारया नायःयात लःल्हानादिल। ज्याझ्वःया हे झ्वलय् तानसेन पाल्पाया थीथी भजन खलः व नगर मण्डप कीर्तिपुरया भजन खलःपाखें भजन नं न्ह्यब्वःगु खः।
