आदिनाथ दिवसय् स्वास्थ्य शिविर
यल (सन्ध्या टाइम्स)/आदिनाथ दिवसया लसताय् थनया श्री आदिनाथ कल्याणकारी कोष व श्री पद्ममंगल स्मृति प्रतिष्ठानया ग्वसालय् सप्तविधानोत्तर पुजा व मचा एवं मिसा ल्वय्या निःशुल्क स्वास्थ्य शिविर ज्याझ्वः जुल ।
श्री आदिनाथ लोकेश्वर (चोभाः करुणामय) यात सुस्वास्थ्यया द्यः माने याना तःगु दु। दँय्दसं कतिंपुन्हि कुन्हु थ्व द्यःयाथाय् मेला जुइ। थ्वहे मेलाया न्हियात थःपिंसं 'श्री आदिनाथ दिवस' धकाः हनेत्यनागु खँ कोषया नायः चक्रमेहर वज्राचार्यं कनादिल। थ्व कुन्हु दँय्दसं थःपिंसं फुसा चोभारय् हे वनाः व मफुसा नःत्वाःया थःगु हे छेँय् सप्तविधानोत्तर पुजा याना वयाच्वनागु खँ नं वय्कलं कनादिल ।
कतिंपुन्हि कुन्हु चोभाः करुणामययाथाय् सुथय् ४ बजेनिसें हे मनूत भिड जुयाः पुजा शुरु यायेधुंकी। खास यानाः कोरी जूपिं मनूतय्सं थ्व द्यःया सेवा यात कि ल्वय् लनी धाइगु चलन दु। लिसें कार्तिक ला जःछि थ्व द्यःयाथाय् थीथी कथंया अप्सं च्वनीपिं मनूत नं उतिकं हे दयाच्वनीगु खः ।
