म्हिगः नं नेप्से क्वय्
येँ (सन्ध्या टाइम्स)/शेयर बजाःया लगानीकर्तातय् उत्साहया पलेसा हाकनं निराशा ब्वलंगु दु। छवाः तक मदिक थहां वंगु नेप्से हाकनं कुहां वनेगु क्रम शुरु जुइवं निराशा ब्वलंगु खः। झण्डै छवाः लिपा स्टक एक्सचेन्जय् जूगु शेयर कारोबारं नेप्से परिसुचक हाकनं कुहां वंगु दु। वंगु छवाःया दुने नेप्से थहां वनेवं शेयर बजाःया विश्लेषकतय्सं नेप्से हाकनं थहां वनीगु सम्भावना तकं खंकूगु खः ।
बजाः चाःगु लगत्तै हे थहां वंगु नेप्से छुं ई तक सामान्य अवस्थाय् थातं लानाच्वंगु खःसा बजाः चाःगु झण्डै झिंन्यागू मिनेट लिपा कुहां वंगु नेप्से हाकनं छक्वः थहां वंगु खः। तर थ्व थहां वनेगु क्रमं नं निरन्तरता काये मफयेवं कुहां वःगु नेप्से कारोबारया अन्त तकं कायम जुइवं २ दशमलव ८७ अंकं कुहां वयाः ५८० दशमलव २३ अंकय् थ्यंगु दु। सेन्सेटिभ नं शुन्य दशमलव ६३ अंकं कुहां वःगु दुसा फ्लोट शुन्य दशमलव १३ अंकं कुहां वल ।
स्टक एक्चेन्जय् जूगु शेयर कारोबारं स्टायण्डर्ड, चार्टर्ड, एसबीआई, हिमालयन, इन्भेष्टमेण्ट, एनआईसिया भाः कुहां वनेवं वाणिज्य समुह २ दशमलव ९६ अंकं कुहां वनाः ५६२ दशमलव ६९ अंकय् थ्यंगु दु। विकास बैंक समुह १ दशमलव २७ अंकं कुहां वनाः ६३६ दशमलव ६७ अंकय् थ्यंगु दु। जलविद्युत समुह नं १ दशमलव ३६ कुहां वयेवं ८२० दशमलव २ अंकय् थ्यन। फाइनान्स समुह २ दशमलव ६१ अंकं कुहां वनाः ६०४ दशमलव १८ अंकय् थ्यंगु दुसा छन्हु न्ह्यः थहां वंगु वीमा समुह म्हिगःया कारोबारय् शुन्य दशमलव १८ अंकं कुहां वनाः ६०२ दशमलव ७९ अंकय् थ्यंगु दु ।
म्हिगःया कारोबारय् स्वीन्यागू कम्पनीया शेयरय् भाः कुहां वःगु दुसा झिंन्हय्गू कम्पनीया जक शेयर भाः थहां वंगु दु। मेगु न्हय्गू कम्पनीया शेयरय् भाः यथावत हे जुल। स्टक एक्सचेन्जय् जूगु कारोबारं नेप्सेया लिसें शेयर व दांया कारोबार नं कुहां वःगु दु। म्हिगः न्यय्गुंगू कम्पनीया छगू लाख स्वद्वः व खुसः व न्हय्च्यागू कित्ता शेयर न्याये-मी जुयाः खुगू करोड छगू लाख पीन्हय्द्वः तका दांया कारोबार जुल ।
स्टक एक्सचेन्जया कथं ख्वीनिगू कम्पनीया कारोबार जूगुली नीन्यागू कम्पनीया शेयरय् भाः थहां वंगु दुसा नीन्हय्गू कम्पनीया शेयरय् भाः कुहां वंगु दु। म्हिगः मुक्कं झिगू कम्पनीया शेयर भाः जक यथावत कायम जुल।
म्हिगःया कारोबारय् दांया ल्याखं नेपाल एसबीआई बैंकं दकलय् अप्वः चय्स्वंगू लाख झिंखुद्वः तका दांया कारोबार याःगु दु। एस डेभलपमेण्ट बैंकं दकलय् अप्वः लब कायेत ताःलाःगु दुसा अन्नपूर्ण फाइनान्सं द्यापं फयेमाःगु दु ।
