राज्यमन्त्री बेगल विरुद्ध सार्वजनिक मुद्दा
सरकारी कर्मचारीत आन्दोलित
पर्साया प्रमुख जिल्ला अधिकारी दुर्गाप्रसाद भण्डारीयात मंगलवाः हातपात यानादिम्ह कृषि व सहकारी राज्यमन्त्री करिमा बेगम विरुद्ध प्रहरीं सार्वजनिक अपराधया मुद्दा दर्ता याःगु दु । प्रहरी निरीक्षक भुवनेश्वरप्रसाद साहं प्रजिअयात हातपात याःगु अभियोगय् मुद्दा दर्ता याःगु खः ।
थ्वहे झ्वलय् राज्यमन्त्री बेगमं प्रजिअयात याःगु हातपातया विरोधय् सरकारी कर्मचारीत आन्दोलनय् कुहांवःगु दु । राज्यमन्त्रीयात कारवाही यायेमाःगु माग यासें नेपाल निजामति कर्मचारी संगठन व राष्ट्रिय कर्मचारी महासंघं बुधवाः निसें आन्दोलन शुरु याःगु दु । कर्मचारीतय्सं बुधवाः सुथं निसें गृहमन्त्रालय व कृषि मन्त्रालय घेराउ यासें धर्ना ब्यूगु दु ।
अथेहे कर्मचारीतय्सं विरोध स्वरुप बुधवाः पर्साया दक्वं सरकारी ज्याकूत बन्द याःगु दुसाः उकीया कारणं सरकारी ज्याकूया दक्वं ज्या ठप्प जूगु दु । कर्मचारीतय्सं सरकारं पर्साया प्रजिअ दुर्गा प्रसाद भण्डारीयात दुर्व्यवहार याःम्ह मन्त्रीयात कारवाही मयातल्ले आन्दोलन यानाच्वनेगु ख्याच्वः ब्यूगु दु ।
सिरहा व भैरवहाया कर्मचारीतय्सं नं बुधवाः निघौ जिल्लाया दक्वं ज्याकूया ज्या ठप्प याःगु दु । अथेहे बारा, सिरहा, कास्की लगायतया कर्मचारीतय्सं नं मंगलवाःया घटनाया विरोध यासें कर्मचारीतय् आन्दोलनय् ऐक्यबद्धता प्वंकूगु दु ।
घटनाया विरोध यासें म्याग्दीया दक्वं निजामती कर्मचारीतय्सं पेन डाउन याःगु दु ।
