'मुनया अभिव्यक्ति हस्तक्षेप मखु'
सरकार समर्थित दलतय्सं राष्ट्रसंघया महासचिव वान की मुनं नेपालय् राष्ट्रिय सहमतिया सरकार आवश्यक जूगु धकाः प्वंकूगु अभिव्यक्ति नेपाःया अन्तरिक मामिलाय् हस्तक्षेप जूगु द्वपं बियाच्वंगु ईलय् सरकारया नेतृत्व यानाच्वंगु नेकपा (एमाले)या अध्यक्ष झलनाथ खनालं उगू अभिव्यक्तियात हस्तक्षेप कथं काये मज्यूगु खँ धयादीगु दु ।
वयेकलं महासचिव मूनया अभिव्यक्तिइ हस्तेक्षप यायेगु कथं छुं नं खँ मदुगु धयादिसें नेपाःया राजनीतिक दलतय्सं न्ववानाच्वं कथं हे वानं नं नेपालय् राष्ट्रिय सहमतिया सरकार निर्माणय् बः ब्यूगु खँ धयादिल ।
छवान्यंकया भारत भ्रमण क्वचायेकाः बुधवाः येँ लिहांझायादिम्ह खनालं त्रिभुवन अन्तराष्ट्रिय विमानस्थलय् पत्रकारत नाप खँल्हाबंला यानादिसें राष्ट्रिय मुद्दाय् ज्या यायेमाःगुलिं दलत छप्पँ जुइमाःगु बिचाः प्वंकादिल । वयेकलं आन्दोलनरत एनेकपा (माओवादी)यात आन्दोलन त्वःता वार्ताय् वयेत नं इनाप यानादिल ।
राष्ट्रिय सहमतिया सरकारय् बः बियादिसें नेता खनालं सहमतिया सरकार गठन यायेत थःम्हं कुतः यायेगु कनादिल । पत्रकारतय्सं अज्याःगु सरकार सुयाःगु नेतृत्वय् जुइले धकाः न्यंगु न्ह्यसलय् वयेकलं राजनीतिक दलत दथुइ सहमति याना: उकीया निर्णय जुइगु धयादिल ।
भारतीय परराष्ट्र मन्त्रालयया ब्वनाय् भारत भ्रमणय् झायादिम्ह खनालं थःगु भ्रमण सद्धभाव व मैत्रीपूर्ण जूगु धयादिसें थ्व भ्रमण राजनीतिक उदेश्यया साथ मयानाःगु स्पष्ट यानादिल । वयेकलं भारत नेपालय् दक्वं राजनीतिक दलत छप्पँ जुयाः शान्ति प्रकृयायात निष्कर्षय् थ्यंकूगु स्वये चाहे जूगु कनादिल ।
भारत भ्रमणया झ्वलय् वयेकलं भारतीय प्रधानमन्त्री मनमोहन सिंह, अर्थ मन्त्री एस. एम. कृष्णा, भारतीय जनता दलया नेता लालकृष्णा आदवानी लगायत नेतात नाप खँल्हाबंला यानादीगु खः । भ्रमण क्वचायेकाः खनाल आइतवाः हे येँ लिहांवयेगु ज्याझ्वः दुगु खसां भारतीय प्रम नाप खँल्हाबंला यायेगु ई मिलेमजुइवं वयेक बुधवाः तिनी लिहांझायादीगु खः ।
