पूर्वया पेट्रोल पम्पत अनिश्चितकालया निंतिं बन्द

पूर्वया थीथी जिल्लाय् दुगु पेट्रोलपम्पय् ज्या यानाच्वंपिं मजदूरतय्सं थःपिनि माग पूमवंगु धासें बुधवाः निसें पूर्वाञ्चलया दक्वं पेट्रोलपम्पत बन्द यानाः आन्दोलन शुरु याःगु दु ।

थीथी झिंन्ह्यगू सूत्रिय माग सहित आन्दोलनय् कुहावंपिं मजदूरतय्सं समस्या समाधान यायेत पटक पटक वार्ता यासां पम्प संचालकत माग पूवंकेत उदासिन जूगुलिं निर्णयक आन्दोन शुरु यानागु खँ अखिल नेपाल पेट्रोलियम मजदुर संघं धाःगु दु । बन्दया कारणं पूर्वाञ्चलय् दुगु प्यस स्वयां अप्वः पेट्रोलपम्प बन्द जूगु दु ।

आन्दोलनरत मजदूरतय्सं स्वामित्व हस्तान्तरण जुइगु ईलय् ज्याया ग्यारेण्टी जुइमाःगु, च्यघौ स्वयां अप्वः ज्या याःसा अत्तिरिक्त ईया पारिश्रमिक बीमाःगु, निस व पीन्हु ज्या याःपिं मजदूतय्त स्वत स्थाई यायेमाःगु आदि माग तयाः आन्दोलनय् कुहांवःगु खः ।