ल्वाभः लःल्हायेधुंकाः जक न्हूगु संविधान : पौडेल
नेपाली कांग्रेस संसदीय दलया नेता रामचन्द्र पौडेलं शिविरय् दुपिं माओवादी लडाकूतय्सं ल्वाभः सरकार समक्ष लःमल्हासें न्हूगु संविधना सुरक्षित मजुइगु खँ धयादीगु दु । वयेकलं माओवादीया सैनिक संरचना पूवंक भंग मजुतल्ले संविधानयात खतारा दुगु धयादिसें माओवादी लडाकूतय्सं न्हापा राज्य समक्ष ल्वाभः लःल्हायेमाः धयादिल ।
तनहुँया कांग्रेस क्षेत्र नम्बर २ समितिं मंगलवाः याःगु भेलाय् न्ववानादिसें वयेकलं न्हूगु संविधान निर्माण याये न्ह्यः शान्ति प्रकृयायात निष्कर्षय् थ्यंकेमाः धयादिल । वयेकलं नेपाली जनता सार्वभौम मजूतल्ले माओवादीया हठ विरुद्ध कांग्रेसया कार्यकर्तातय्त ल्वानाच्वनेत निर्देशन बियादिल ।
वयेकलं सरकारया नेतृत्व नं याये धुंकूगु माओवादीं अझ नं हत्या, हिंसा, लुटपाट व चन्दा आतंक ब्वलंकाच्वंगु द्वपं बियादिसें थुकीया विरुद्ध ग्रामिण स्तरय् कांग्रेस संगठित जुइमाःगु बिचा: प्वंकादिल ।
