कार्यकर्तां बदनाम यानाच्वंगु सरकार

देशय् माओवादीया सरकार न्ह्यानाच्वंगु इलय् माओवादीया हे भातृ संगठनतय् अराजकतां थीथी ख्यः अस्तव्यस्त जुयाच्वंगु दु । माओवादी कार्यकर्तायात विरोध मयः व उमिगु विरोधय् च्वईपंत सह याये मफु । विशेष यानाः थःगु राजनीतिक पार्टीया बिचाः लिसे ज्वःमलाःपिंत उमिस 'कारवाही' यानाच्वंगु दु । उद्योग स्वास्थ्य क्षेत्रय् तकं माओवादीया थज्याःगु आक्रमण जारी जुयाच्वंगु दु ।

माओवादी कार्यकर्ताया थज्याःगु हे ज्यां यानाः थौंकन्हय् सत्ता साझेदार पार्टीतय् दथुइ वैमनस्यता ब्वलनाच्वंगु दु । गुकिं कन्हय् माओवादी नेतृत्वया सरकार सरकारय् दुगु इलय् माओवादी कार्यकर्तातय्सं यानाच्वंगु थ्व ज्यां जनतां असुरक्षित जूगु महसुस याये मालाच्वंगु दु । यदि देय्या फुक्कं थासय् माओवादी कार्यकर्ताया थज्याःगु दवाव अप्वया वन धाःसा थुकिं छखे माओवादी जनताया नजरय् बदनाम जुइगु जक मखु संक्रमकालीन इलय् न्ह्यानाच्वंगु गठबन्धन सरकारयात नं लिच्वः लायेफु । आःया सत्ता समीकरण स्यनाः माओवादीया ल्हातिं सत्ता चुलुया वनीगु सम्भावना दु ।

निश्चित खः, नेपाःमि जनतां माओवादीयात अप्वः मत बियाः सरकार चले यायेत म्याण्डेट बिउगु दु । तर उकिया अर्थ वया भातृ संगठनतय्त थः यत्थे याना जु धकाः लाइसेन्स बिउगु धाःसा मखु । तर माओवादी कार्यकर्ताया क्रिरयाकलापं थौं जनताया मत हे गलत जुल ला धकाः न्ह्यसः ब्वलंगु दु । अथे जूगुलिं थःगु सरकार बचे यायेगु खःसा व सरकारयात बदनाम जुइगुपाखें पनेगु खःसा माओवादी कार्यकर्तां संयम यायेमाःगु अतिकं आवश्यक दु ।

More Stories Like this