राजदूतपिनिगु नां सर्वसम्मतं अनुमोदन
व्यवस्थापिका संसद अर्न्तगतया संसदीय सुनुवाई विशेष समितिं बेलायत व ईजिप्टया निंतिं प्रस्तावित राजदूतपिनिगु नां सर्वसम्मत अनुमोदन याःगु दु । विशेष समितिं निगू नां सर्वसम्मत यायेवं हे उमित राजदूतय् नियुक्त यायेगु निंतिं सरकारयात लँपू चाःगु खः ।
मंगलवा: क्वःछ्यूगु ई स्वयां लिबाक्क च्वंगु बैठकं बेलायतया निंतिं प्रस्तावित राजदुत डा. शुरेस चालिसे व ईजिप्टया निंतिं प्रस्तावित मेम्ह राजदुत श्यामलाल तबदारया सुनुवाईलिपा सर्वसम्मत नां अनुमोदन याःगु खँ समितिया सभापति कुलबहादुर गुरुङं जानकारी बियादीगु खः ।
बेलायतया निंतिं प्रस्तावित राजदूत चालिसें समितिइ न्ववानादिसें द्धन्दकालय् ध्वस्त जूगु भौतिक संरचना निमार्ण यायेगु निंतिं थःम्हं बेलायत सरकारलिसे बिशेष पहल यायेगु धयादीगु दु । वय्कलं नेपा:पाखें अवैद्ध रुपं अध्ययन यायेत छ्वःपिं विद्यार्थीया सम्बन्धय् नं खँ ल्ह्वनेगु धयादिल ।
निम्हं राजदूतया प्रस्तावित नांया विरुद्ध छु नं उजुरि मलाःगु ख: । थ्व स्वयाः न्ह्यः म्हिगः समितिं दक्षिण अफ्रिकाया निंतिं प्रस्तावित राजदूत अरुण प्रसाद धितालया नां सर्वसम्मत अनुमोदन याःगु खः ।
