शंखधर साख्वाः विमानस्थल !
शाहवंशीय जुजुपिनि नां क्वकयाः तयातःगु थीथी थाय् शिक्षण संस्था आदिया नां हिलेमाः धकाः क्रान्तिकारी विद्यार्थी संगठनं आन्दोलन यानाच्वंगु इलय् लाक्क नेवाः देय् दबुलिं त्रिभुवन अन्तर्राष्ट्रिय विमानस्थलया नां हिलाः 'शंखधर साख्वाः अन्तर्राष्ट्रिय विमानस्थल' तयेमाः धकाः सरकारयात सुझाव बिउगु दु ।
देय् दबूपाखें आः नकतिनि पर्यटन तथा नागरिक उड्डयन मन्त्री हिसिला यमियात थ्व सुझाव बिउगु खःसा मन्त्री यिमं थम्हं थ्व सुझाव सम्बन्धित निकायय् यंकेगु बचं बियादीगु खः । यदि जुजुपिनि नामं तयातःगु थज्याःगु निकायया नां हिलेगु निर्णय सरकारं यात धाःसा राष्ट्रिय विभूति शंखधर साख्वाःया नामं अन्तर्राष्ट्रिय विमानस्थलया नामाकरण जुइफुगु खँ सूत्रं धाःगु दु ।
थ्वहे झ्वलय् क्रान्तिकारी विद्यार्थीतय्सं त्रिभुवन विश्वविद्यालयया नां नं हिलेमाः धइगु माग यासें उकुन्हु किपुली सिट्टी पुयाः जुलुस पिकाःगु खः ।
सूत्रं धाः कथं क्रान्तिकारी विद्यार्थीतय्सं जुजुपिनि नामं तयातःगु शिक्षण संस्था, थाय् आदिया लगत तयेगु ज्या न्ह्याकाच्वंगु दु । उमिसं स्वनिगः बाहेक पिने जिल्लाय् नं उकथंया लगत कायेका तःगु दु ।
