कोइराला अस्पताल भर्ना
येँ (सन्ध्या टाइम्स)/ नेपाली कांग्रेसया सभापति गिरिजाप्रसाद कोइरालाया स्वास्थ्य झन् स्यना वनेवं वय्कःयात थौं सुथय् सहिद गंगालाल ह्दय रोग केन्द्रय् भर्ना याःगु दु ।
थुकिया नापं वासः याकेत वय्कःयात कन्हय् सिंगापुर यंकेगु ज्याझ्वः नं आःयात स्थगित याःगु दु। स्वास्थ्यया कारणं प्लेनं यंकेबलय् समस्या वये फइगु सम्भावना अप्वया वनेवं सिंगापुर यंकेगु ज्या स्थगित याःगु खः ।
वय्कःयात आः गंगालाल केन्द्रया डिलक्स क्याबिनय् वासः याकातःगु दु ।
वय्कःया स्वास्थ्यस्थिति सुधार जुया वनाच्वंगु खँ वय्कःया म्ह्याय् उपप्रधानमन्त्री व परराष्ट्रमन्त्री सुजाता कोइरालां कनादीगु दु। सभापति कोइरालां आः सामान्य खँल्हाबल्हा यानाच्वंगु खँ नं मन्त्री कोइरालां कनादीगु दु ।
थ्वहे झ्वलय् गंगालाल अस्पतालं छगू प्रेस विज्ञप्ति पित बिसें कोइरालाया हिइ अक्सिजनया कमी जूगु खँ धाःगु दु। अथे हे कोइरालाया अवस्था सामान्य जूगु खँ नं विज्ञपितइ न्ह्यथनातःगु दु ।
कोइरालायात गंगालालय् तयेवं अन कांग्रेसया नेता कार्यकर्ताया भिड शुरु जूगु दु । गंगालालय् भर्ना याये न्ह्यः थौं सुथय् कोइरालां पार्टीया सकलें वरिष्ठ नेता व मन्त्रीतय्त महाराजगंजय् सःताःदीगु खः ।
