स्वनिगः वयेगु नाका फुक्क हे बन्द
येँ (सन्ध्या टाइम्स)/एनेकपा (माओवादी) या घोषित आन्दोलन कथं थौं स्वनिगः दुहां वयेगु फुक्कं नाका ठप्प जूगु दु। माओवादी कार्यकर्तातय्सं स्वनिगः दुहां वयेफु नाकाय् नाराबाजी यासें धर्ना बियाच्वंगुलिं स्वनिगः दुहां पिहां जुइमाःगु यातायात पूर्ण रुपं बन्द जुयाच्वंगु दु ।
माओवादी कार्यकर्तातय्सं येँया थक्वाः, सुन्दरीजल, फम्पि, ख्वपया नाला, साँगा, नुवाकोटया ओखरपौवा, चितवनया मुग्लिङ्ग, यलया लाकुरे भञ्ज्याङ्ग, भट्टे डाँडा, आदि लागाय् धर्ना बियाच्वंगु दु। मुग्लिङ्गय् टायर च्याकाः प्रदर्शन यानाच्वंगु दुसा थक्वातय् प्याखं हुलाः लँ पनातःगु दु। उमिसं थौं सुथय् ५.३० बजेनिसें हे नाका पनेगु शुरु याःगु खः। पत्रकार, एम्बुलेन्स व पर्यटकया गाडी धाःसा चले याके बिउगु दु। धर्नाय् प्रहरी नं तैनाथ याना तःगु दु ।
