माओवादीं बजेट पारित याकीगु
येँ (सन्ध्या टाइम्स)/ एनेकपा (माओवादीं) बजेट पारित याकेत छन्हु सदन चले याकेगु बारे सहलह न्ह्याकूगु दु। पार्टीया केन्द्रीय नेतातय् दथुइ थ्व बारे सहलह शुरु जूगु खँ सूत्रं धाःगु दु।
सूत्रं धाः कथं बजेट पारित याइ कुन्हु माओवादी सभासद्त बैठक बहिष्कार यानाः पिहां वनेगु व बजेट पारित जुइधुंकाः हाकनं सदन अवरुद्ध यायेगु ज्याझ्वः दयेकेगु कथं सहलह जुयाच्वंगु खः
।
कर्मचारीतय्त तलब मनकेगु माओवादीया ग्वसाः जुयाच्वन धकाः वयाच्वंगु समाचारया खण्डन यायेत माओवादीं बजेट पारित याकेत्यंगु खँ सूत्रं धाःगु दु ।
थ्व बारे माओवादीं थौं बहनी वा कन्हय् सुथय् तकया दुने थःपिनि धापू सार्वजनिक याइगु खँ नं सूत्रं धाःगु दु।
माओवादीं सदन अवरुद्ध यानाच्वंगु कारणं वंगु स्वला न्ह्यवंनिसें सरकारं सदनय् न्ह्यब्वःगु बजेटय् सहलह तकं न्ह्याके फयाच्वंगु मदु। बजेट पारित मजुयाः मेगु अस्तव्यस्तता वयेफुगु खँयात ध्यानय् तयाः माओवादी अध्यक्षं बजेट पारित याके बीगु घोषणा म्हीग यानादीगु खः ।
