झलनाथं थौं भारतीय प्रम नापलात

येँ (सन्ध्या टाइम्स)/भारत भ्रमणय् झायाच्वंम्ह एमालेया अध्यक्ष झलनाथ खनालं भारतीय प्रधानमन्त्री मनमोहन सिंहलिसे नापलानाः खँल्हाबल्हा यानादीगु दु। वय्कःपिनि दथुइ नेपालय् न्ह्यानाच्वंगु राजनीतिक अवरोध, शान्ति प्रक्रिया व संविधान च्वयेगु ज्याया बारे सहलह जूगु खः। भारतीय प्रमं ई मबीवं म्हिगः हे वय्कः लिहां वयेत्यंगु खःसा लिपा भारतीय राजदूत राकेश सुदं नेपालं दिल्ली वनाः प्रम नापलायेगु ई मिले याना बिउगु खः। वयां लिपा खनालं थःगु भारत भ्रमण छन्हु ताःहाकः यानादीगु खः ।