स्वास्थ्य सेवा परिषदयात ग्वाहालि
येँ (सन्ध्या टाइम्स)/सामुदायिक स्वास्थ्य सेवा परिषदया वंगु आइतवाः जूगु छगू ज्याझ्वलय् चन्दादाता मय्जु जीवन केसीं थः मदुम्ह जहान कृष्णगोविन्द केसीया लुमन्तिइ असहाय विरामी स्वास्थ्य सेवा कोष स्वनेगु निंतिं छगू लख झिंनिद्वः व सछि व नीन्यातका दां लःल्हानादीगु दु ।
परिषदया नायः रत्ननारायण न्हूजवाः साय्मिया सभापतित्वय् जूगु उगु ज्याझ्वलय् वरिष्ठ कलाकार शुभद्रा अधिकारीं थः मां नुरादेवीया नामय् झिंन्याद्वः तका तूगु बेड लःल्हाःगु खः।
अथे हे ज्याझ्वलय् मय्जु सगुन अधिकारी व छेँजःपिंपाखें नं मदुम्ह कृष्णप्रसाद अधिकारीया नामय् झिंन्याद्वः तका तूगु बेड लःल्हाःगु खः ।
परिषदया उपाध्यक्ष हरिगोपाल श्रेष्ठं लसकुस यानाः न्ह्याकूगु ज्याझ्वलय् पुलांम्ह वडाध्यक्ष व परिषदया सल्लाहकार ईश्वरमान डंगोल व कलाकार शुभद्रा अधिकारीपिंसं थःथःगु नुगः खँ प्वंकादीगु खःसा सचिव भीमबहादुर गुरुङं सुभाय् देछानादीगु खः ।
