प्रचण्डयात जम्मकटेलया हाथ्या
हिमाल मिडियाया ज्याकुथी आक्रमण याःपिंत कारवाही यायेगु धकाः प्रधानमन्त्री एवं माओवादी अध्यक्ष प्रचण्डं धयादीगु खँयात वय्कःया हे कार्यकर्ता एवं सभासद् शालिकराम जम्मकटेलं चुनौति बिउगु दु ।
सभासद् जम्मकटेलं हिमाल मिडियां लिकया हःपिं १८ म्ह मजदूरतय्त पुनर्वहाली मयायेक सुं नं मजदूरयात कारवाही यात धाःसा थःपिं आन्दोलनय् कुहां वयेगु ख्याच्वः बिउगु खः ।
हिमालय् तोडफोड याः वंपिं माओवादी मजदूरतय्त कारवाही यायेगु लागिं सरकारं साचार मन्त्री कृष्णबहादुर महरायात जिम्मा बिउगु खःसा थ्व जिम्मा बिउकुन्हु हे जम्मकटेलं नं उगु ख्याच्वः बिउगु खः ।
वय्कलं लिकयाहःपिं मजदूरतय्त पुनर्वहाली मयायेकं न्ह्याम्हेस्यां न्ह्यागु धाःसां थःपिं माने मजुइगु अडान नं स्पष्ट यानादिल ।
उखे आक्रमणकारीतय्त ज्वनाः तुरुन्त कारवाही यायेगु धकाः सरकारं मन्त्री महरायात जिम्मा बिउसां थौं तक सुयातं ज्वंगु धाःसा मदुनि । मन्त्री महरां बुधवाः न्हिछिया दुने छानबीन यानाः सरकारयात विवरण लःल्हायेगु खँ धाःगु खः ।
मेखे थुगु घटनाया विरोधय् आन्दोलन यानाच्वंगु थीथी साचार संस्थातय्सं आक्रमणकारीतय्त ज्वनाः फौजदारी कारवाही जुइमाः धकाः माग यानाच्वंगु दु । पत्रकारतय् आन्दोलन थौं नं जारी दनि ।
