नेप्से ४ अंक कुहां वन
येँ (सन्ध्या टाइम्स)/झण्डै छवाः लिपा स्टक एक्सचेन्जय् जूगु शेयर कारोबारं नेप्से परिसुचक हाकनं कुहां वंगु दु। वंगु छवाःया दुने नेप्से थहां वनेगु क्रम शुरु जुइवं शेयर बजारं न्हापां थें गति काइगु व शेयर बजाः थहां वनेफुगु सम्भावनाया संकेत खने दुगु थुकिया बिश्लेषकतय्सं याःगु खः। वंगु छवाःया दुने राजनीतिक निकासया सम्भावनाया लिसें लगानीकर्तातय् दथुइ नं उत्साह ब्वलना वःगु खः। तर हाकनं नेप्से कुहां वनेवं थुकिया लगानीकर्तातय् दथुइ द्विविधा ब्वलंगु खनेदत ।
स्टक एक्सचेन्जय् म्हिगः कारोबार शुरु जुइवं हे नेप्से नं थहां वनेगु क्रम शुरु जूगु खः। तर बजाः चाःगु झण्डै छघौ त्या लिपा कुहां वंगु नेप्से कारोबार अन्त तकं थ्व हे गतिं निरन्तरता काल। म्हिगः नेप्से जक मखसे कारोबार जूगु दक्वं समुहया सुचक नं कुहां वंगु दु। थुकीमध्ये दकलय् अप्वः नेप्से ४ दशमलव ११ अंकं कुहां वनाः ५८३ दशमलव १ अंकय् थ्यंगु दु। अथे हे सेन्सेटिभ १ दशमलव २१ अंकं कुहां वनाः १४६ दशमलव ५८ अंकय् थ्यन। उखे फ्लोट शुन्य दशमलव ३८ अंकं कुहां वल ।
शेयर बजारय् दकलय् अप्वः नविल, इन्भेष्टमेण्ट, एनआईसी, एभरेष्ट व बीओकेया शेयरय् भाः कुहां वयेवं थुकिया लिच्वः शेयर बजारय् नेप्सेय् नं लाःगु खः। थुकिया लिसें कारोबार जूगु उपसुचकय् वाणिज्य समुह ४ दशमलव ४७ अंकं कुहां वयेवं ५६५ दशमलव ६५ अंकय् थ्यन। थ्वयां लिउ जलविद्युत समुह २ दशमलव ८१ अंकं कुहां वयाः ८२६ दशमलव ९ अंकय् थ्यंगु दु। विकास बैंक समुह शुन्य दशमलव १७ अंकं कुहां वनाः ६३७ दशमलव ९४ अंकय् थ्यन। फाइनान्स समुह नं १ दशमलव ९ अंकं कुहां वयेवं ६०६ दशमलव ६५ अंकय् थ्यंगु दु। उखे म्हिगःया कारोबारं थहां वंगु छगू जक वीमा समुहया उपसुचक शुन्य दशमलव १७ अंकं थहां वनाः ६०२ दशमलव ५१ अंकय् थ्यंगु दु ।
म्हिगःया कारोबारय् शेयर कारोबार थहां वंसा नेप्सेया लिसें दांया कारोबारय् धाःसा कुहां वःगु दु। छगू लाख न्हय्छद्वः गुसः व स्वीगू कित्ता शेयर न्याये-मी जुयाः च्यागू करोड न्हय्न्यागू लाख स्वीप्यद्वः तका दांया कारोबार जुल। कारोबार कम्पनी मध्ये दांया ल्याखं पिपल्स फाइनान्स कम्पनी लिमिटेडं दकलय् अप्वः छगू करोड स्वीगू लाख तकां दांया कारोबार याःगु दु। जनरल फाइनान्स लिमिटेडं दकलय् अप्वः कमे यायेत ताःलाःगु दुसा नेपाल त्रे्कडिट एण्ड कमर्श बैंकं दकलय् अप्वः द्यापं फयेमाःगु दु ।
स्टक एक्सचेन्जया कथं ख्वीनिगू कम्पनीया कारोबार जूगुली नीन्यागू कम्पनीया शेयरय् भाः थहां वंगु दुसा नीन्हय्गू कम्पनीया शेयरय् भाः कुहां वंगु दु। म्हिगः मुक्कं झिगू कम्पनीया शेयर भाः जक यथावत कायम जुल ।
