खनाल व भारतीय प्रम दथुइ खँल्हाबंला
छवान्यंकया भारत भ्रमणय् झायादिम्ह नेकपा (एमाले)या अध्यक्ष झलनाथ खनाल व भारतीय प्रधानमन्त्री मनमोहन सिंह दथुइ खँल्हाबंला जूगु दु ।
मंगलवाः नेपाःया ई कथं झिनितात्याः ईलय् जूगु खँल्हाबंलाय् नेपाःया शान्ति प्रकृया, न्हूगु संविधान निर्माण नापं वर्तमान राजनीतिक गतिरोधया बारे सहलह जूगु खः । खँल्हाबंलाय् भारतीय प्रम सिंहं नेपाःया दक्वः राजनीतिक दलत छप्पँ जुयाः न्ह्या वनेत इनाप यानादीगु खः ।
एमाले अध्यक्ष खनाल व भारतीय प्रम दथुइ वंगु बुधवाः हे खँल्हाबंला जुइगु ज्याझ्वः दुगु खःसां प्रधानमन्त्री मनमोहन सिंहं ई मबीवं छवाः लिपाः जक वयेकपिं दथुइ खँल्हाबंला जूगु खः ।
भारतीय प्रम नाप खँल्हाबंला लिपा खनाल बुधवाः नेपाः लिहांझायादीगु जूगु दु । भारत भ्रमणया झ्वलय् वयेकलं भारतीय नेतात नापं बुद्धिजिवि, पत्रकार लगायत नाप खँल्हाबंला यानादीगु खःसां भारतीय कांग्रेस आइया अध्यक्ष सोनिया गान्धिं धाःसा वयेयात नापलानामदी ।
