माओवादी पाखें स्वनिगः नाकाबन्दी
नागरिक सर्वोच्चताया माग यासें निगूगु चरणया आन्दोलन यानाच्वंगु प्रमुख प्रतिपक्षी दल एकीकृत नेकपा (माओवादीं) आन्दोलनया ज्याझ्वः कथं मंगलवाः स्वनिगः नागाबन्दी याःगु दु । माओवादी याःगु नाकाबन्दीया कारणं स्वनिगः दुने वयेगु व स्वनिगः पाखें पिने वनेगु दक्वं सवारी साधान प्रभावित जूगु दु ।
माओवदीया नेता व कार्यकर्तातय्सं मंगलवाः सुथं निसें हे स्वनिगः दुहांवयेगु प्रमुख नाकाय् मूनाः अवरोध यायेवं नाकाया आवागमन प्रभावित जूगु खः । माओवादी नागढुङा, बालाजु, भट्टडाँडा, फम्पि, साँगा, लगायत नाकाय् च्वनाः स्वनिगः दुने पिने जुइ मब्यूगु खः । प्रदर्शनकारीतय्सं प्रमुख नाकाय् नाराबाजी नापं म्ये व प्याँख ल्हुया बन्द यायेगु ज्या याःगु खः ।
स्वनिगः नाकाबन्दी याःसां स्वनिगः दुने धाःसा जनजविन सामान्य रुपं न्ह्याःगु दु । स्वनिगः दुने सधां थें बजाः, ज्याकू, विद्यालय, यातायात आदि सुचारु जुयाच्वंगु दु ।
सरकारं माओवादीया नाकाबन्दीयात मध्यनजर यानाः स्वनिगःया प्रमुख नाकाय् सुरक्षा व्यवस्था अत्यन्त कडा यानातःगु दु ।
