किरात गणराज्य घोषणा
एकीकृत नेकपा (माओवादीं) थःपिनिगु निगूगु चरणया आन्दोलनया ज्याझ्वः कथं गणराज्य घोषणा यायेगु ज्याझ्वः लित काःसां माओवादीया स्थानीय इकाईं सोमवाः किरात गणराज्यया घोषणा याःगु दु ।
माओवादीया किरात राज्य समितिं सोमवाः छगू तःजिगू ज्याझ्वः यानाः खोटाङया सदरमुकाम दित्तेलय् उगु राज्य घोषणा याःगु खः । माओवादी किरात राज्य समितिया इन्चार्ज नापं माओवादी पोलिटब्यूरो दुजः गोपल किरातीं किरात गणराज्यया घोषणा यानादीगु खः ।
ज्याझ्वलय् न्ववानादिसें किरातीं जातीय सद्भाव व समानतया पक्षय् ल्वायेत किरात गणराज्यया घोषणा यानागु धयादिसें भारतीय विस्तारवाद, सामान्ती, पुँजीवादीया निंतिं किरात राज्यया लूखा बन्द जुइगु ख्याच्वः बियादिल ।
पुलांम्ह राज्य पुर्नसंरचना मन्त्री नं जुयादिम्ह किरातीं थ्व सांकेतिक रुपं जक राज्य घोषणा यानागु खँ कनादिसें छुं ई लिपाः पदाधिकारीत नं चयन यायेगु धयादिल । वयेकलं थ्व घोषणा माओवादीया अध्यक्ष पुष्पकमल दाहाल 'प्रचण्ड'या स्वीकृति कया: हे यानागु दाबी यानादिल ।
किरात राज्य समितिं पूर्वया खोटाङ, ओखलढुङ्गा, भोजपुर, सोलुखुम्बु, उदयपुर व संखुवासभा यानाः खुगू जिल्लयात जाति, भाषा, संस्कृति व ऐतिहासिकताया आधारय् किरात गणराज्य घोषणा याःगु खः । ज्याझ्वलय् माओवादीया खुगूलिं जिल्लाया सभासद्तय् ब्वति दुगु खसाः गणराज्य घोषणा याये न्ह्यः व घोषणा याये धुंकाः थीथी जिल्ला व गांमय् जुलुस पिहांवःगु खः ।
