'माओवादीं सतकं सत्ता कब्जा यायेत स्वयाच्वन'
उपप्रधानमन्त्री नापं भौतिक योजना मन्त्री विजयकुमार गच्छदारं आन्दोलनरत एनेकपा (माओवादीं) सतकं सत्ता कब्जा यायेत स्वयाच्वंगु द्वपं बियादीगु दु । वयेकलं माओवादीं सतकं सत्ता कब्जा यायेत स्वयाः अलोकतान्त्रिक पह क्यनाच्वंगु धयादिल ।
स्वनिगः निसें तराई थ्यनीगु यल-निजगढ द्रुत मार्गया सोमवाः मकवानपूरया बुदुनेय् शिलान्यास यानादिसें वयेकलं अल्पमतं बहुमतयात बन्धक दयेके मफइगु धयादिसें माओवादीं संसद अवरुद्ध यायेगु ज्या यानाच्वंसां बजेट संसदं हे पारित जुइगु दाबी यानादिल ।
वयेकलं माओवादीं उमिगु आन्दोलनया झ्वलय् छगू लख जनता हयाः सिंहदरवार घेराउ यासाः उमित झिगू लख जनतां घेराउ याइगु दाबी यानादिल ।
अथेहे ज्याझ्वलय् मेम्ह उपप्रधानमन्त्री सुजाता कोइरालां सहमति व सहकार्य बिना संविधान निर्माण यायेगु ज्या अस्मभव जूगु धयादिल ।
येँ-तराई द्रुत मार्गया उल्लेज्या निम्ह उपप्रधानमन्त्री गच्छदार व कोइरालां मंकाः रुपं यानादीगु खः ।
