जुजुवादीया छेँय् प्रचण्ड
येँ (सन्ध्या टाइम्स)/ एनेकपा (माओवादी) या अध्यक्ष 'प्रचण्ड' म्हिगः वीरगञ्जं लिहां वयेगु झ्वलय् हेटौंडाय् च्वंम्ह पुलांम्ह जुजुवादी अजय सुमार्गीया छेँय् ज्यःनाः यानाः येँय् लिहां वःगु खँ सीदुगु दु ।
अध्यक्ष प्रचण्ड वीरगञ्जं लिहां वयेगु झ्वलय् निघौ तक सुमार्गी कम्प्लेक्सय् च्वनादीगु जुयाच्वन। तर थ्व खँ धाःसा स्थानीय पार्टी कार्यकर्ता सुनां हे मसिउ। लिपा कार्यकर्तां सीकाः अन नापलाः वंगु खःसां छुं छुं जिल्ला स्तरीय कार्यकर्तायात बाहेक मेपिंत धाःसा सुमार्गी कम्प्लेक्सय् हे दुमकाःगु खँ धाःगु दु।
अध्यक्ष प्रचण्डं मकवानपुरया सभासद् दिलबहादुर घिसिंग व वाईसीएल जिल्ला अध्यक्ष प्रेमबहादुर पुलामीयात नापलानादीगु खः। प्रचण्ड नापं केन्द्रीय दुजः सीपी गजुरेल नं दीगु खः।
उगु इलय् सुमार्गी व प्रचण्डया दथुइ ताःहाकः खँल्हाबल्हा जूगु खँ नं सूत्रं धाःगु दु ।
लुमंकेबहःजू, प्रचण्ड प्रधानमन्त्री जुयाः वालुवाटारय् च्वनाच्वंगु इलय् नं सुमार्गीं थीथी सामानत प्रम निवासय् थ्यंकेगु याइगु खः ।
