नेप्से थहां वनेगु क्रम जारी
येँ(सन्ध्या टाइम्स)/नेपाल स्टक एक्सचेन्जय् जुयाच्वंगु शेयर कारोबारं लगातार कुहां वयाच्वंगु नेप्से परिसुचक ताः ई लिपा वाःया न्हापांगु सुभार जुयाः वंगु दु। शेयर बजारं हाकनं न्हापां थें हे गति कायेवं थुकिया लगानीकर्तातय् दथुइ नं छगू कथंया उत्साह खने दयावःगु दु। नापं बजाः विश्लेषकतय् कथं शेयर बजाः थहां वनेफुगु प्रति सकारात्मक संकेत खने दया वःगु दु ।
खतुं कारोबार शुरु जूगु छुं ई लिपा हे नेप्से न्यागू अंकं मल्याक कुहां वयेधुंकूगु खः। तर छुं ई लिपा हे हाकनं थहां वनेगु क्रमं निरन्तरता कायेवं नेप्से म्हिगः २ दशमलव ५७ अंकं थहां वनाः ५८७ दशमलव २१ अंकय् थ्यंगु दु। अथे हे सेन्सेटिभ नं १ दशमलव ४७ अंकं थहां वनाः १४७ दशमलव ७९ अंकय् थ्यन। फ्लोट नं शुन्य दशमलव ११ अंकं थहां वनाः ५५ दशमलव ९६ अंकय् थ्यंगु दु ।
शेयर बजारय् नेप्से थहां वनेगुली वाणिज्य समुहया प्रमुख बैंकत स्वयां म्हिगःया कारोबारय् हिमालयन, नेपाल इन्भेष्टमेण्ट, प्राइम व एसबीआई बैंकया कारणं नेप्सेया लिसें वाणिज्य समुह नं थहां वन। थुपिं बैंकया शेयर भाः थहां वनेवं वाणिज्य समुह ६ दशमलव १ अंकं थहां वनाः ५७० दशमलव ३९ अंकय् थ्यन। अथे हे थहां वंगु मेमेगु उपसुचकय् विकास बैंक समुहया उपसुचक १ दशमलव ८१ अंकं थहां वनाः ६३८ दशमलव ३४ अंकय् थ्यंगु दुसा जल विद्युत समुह नं ५ दशमलव ५९ अंकं थहां वनाः ८३० दशमलव ८३ अंकय् थ्यंगु दु ।
मेखे फाइनान्स समुहया उपसुचक शुन्य दशमलव ६१ अंकं कुहां वनाः ६०८ अंकय् थ्यन। अथे हे वीमा समुह नं शुन्य दशमलव २३ अंकं कुहां वनाः ६०६ दशमलव ३९ अंकय् थ्यंगु दु ।
राजनीतिक अस्थिरताया कारणं न्हिथं कुहां वनाच्वंगु नेप्से वंगु झण्डै निदँ न्ह्यःया स्थितिइ तक थ्यनेधुंकूगु खः। मेखे नेप्सेय् सुचीकृत जुयाच्वं कम्पनीतय्सं नाफा कमे यानाच्वंगु जानकारी धमाधम पित बिउसां लगानीकर्तातय् विश्वास धाःसा त्याकेफुगु मदु। वंगु छुं ई न्ह्यः लबः कायेत ताःलाःगु धासे आपालं कम्पनीं बोनस, हकप्रद शेयर व लाभांश बीगु घोषणा याःसां शेयर भाः कुहां वनेगु क्रमं धाःसा निरन्तरता काःगु खः ।
मेमेगु न्हि स्वयां म्हिगः शेयर भाः कुहां वःगु कम्पनीया ल्याः अप्वःगु दु। म्हिगः ख्वीन्हय्गू कम्पनीया कारोबार जूगुली स्वीस्वंगू कम्पनीया शेयर भाः थहां वंगु दुसा स्वीछगू कम्पनीया शेयरय् भाः कुहां वल। स्वंगू जक कम्पनीया शेयर भाः यथावत कायम जुल। नेप्सेया लिसें ताः ई लिपा शेयर कारोबार नं थहां वंगु दु। म्हिगः छगू लाख न्हय्गुद्वः खुसः व न्हय्गू कित्ता शेयर न्याये-मी जुयाः च्यागू करोड पीखुगू लाख गुद्वः तका दांया कारोबार जुल ।
