राष्ट्रपति पाखें कोइरालाया स्वास्थ्य अवस्था बारे जानकारी
स्वँलाय् लः जायाः अशक्त जुयादिम्ह नेपाली कांग्रेसया सभापति गिरिजाप्रसाद कोइरालाया स्वास्थ्य स्थितिया बारे राष्ट्रपति डा. रामवरण यादवं जानकारी कयादीगु दु ।
सोमवाः कोइराला निवास महाराजगंज थ्यंकाः राष्ट्रपति यादवं वयेकया स्वास्थ्य अवस्था बारे जानकारी कयादीगु खः । न्हिनय् प्याताः ईलय् कोइराला निवास थ्यंकादिम्ह यादवं नीगू मिनेट कोइराला नाप खँल्हाबंला यानाः लिहांझायादीगु खः ।
अथेहे सोमवाः सुथय् कांग्रेस संसदीय दलया नेता रामचन्द्र पौडेल लगायत कांग्रेस नेतात नं कोइराला निवास वनाः वयेकया स्वास्थ्य अवस्था बारे जानकारी कयादीगु खः ।
आइतवाः सुथय् निसें उसाँय् मदुम्ह कोइरालायात वास: याकेत बुधवाः सिंगापुरय् यंकेगु तयारी जुयाच्वंगु दुसाः आ:यात वयेकया हे छेँय् निजि चिकित्सकत पाखे वास: यायेगु ज्या जुयाच्वंगु दु ।
उखे प्रधानमन्त्री माधवकुमार नेपालं उसाँय् मदयाः प्रधानमन्त्री निवासय् आराम यानाच्वनादीगु दु । वयेकयात आइतवाः बहनी १०५ डिग्री ज्वरो वःगु खः ।
