येँ नं तराई थ्यनीगु द्रुत मार्गया निर्माण शुरु
स्वनिगः निसें तराई थ्यनीगु यल-निजगढ द्रुत मार्गया निर्माण शुरु जूगु दु । सोमवाः मकवानपूरया बुदुने जूगु छगू ज्याझ्वःया दथुइ उपप्रधानमन्त्रीत विजयकुमार गच्छदार व सुजाता कोइरालां थुकीया शिलान्यास यानादीगु खः ।
प्रधानमन्त्री माधवकुमार नेपालं द्रुत मार्ग निर्माणया शिलन्याश यायेगु ज्याझ्वः क्वछीनातःगु खसां वयेकया उसाँय् मदुगुलिं निम्ह उपप्रधानमन्त्रीतय्सं थुकीया मंकाः शिलन्याश यानादीगु खः ।
द्रुत मार्ग यलया खोकना निसें बाराया निजगढ तक ७६.२ किलोमिटर दूरी दइ । नेपाली सेनायात निर्माणया जिम्म ब्यूगु द्रुत मार्गया निर्माण यायेत न्यय्खुगू अर्ब तुइगु अनुमान याःगु दु । अथेहे थुकीया निर्माण ज्या स्वदँया दुने पूवंकेगु ताः तःगु दु ।
वंगु साउनय् हे थुगु लँपू निर्माणया ज्या शुरु यायेगु ग्वसाःग्वःगु खसां विशेष कारण बस स्थगित यायेमाःगु खः । द्रुत मार्ग निर्माणया जिम्मा विश्व बैंक लगायत दार्त संस्थातय्सं माग यासां सरकारं थःगु हे नेतृत्वय् निर्माण ज्या शुरु याःगु खः ।
थ्व सतक निर्माण लिपाः निघौया दुने सवारी साधनत येँ नं बाराया निजगढ थ्यंकेफइ ।
