खनाल व भारतीय प्रम दथुइ मंगलवाः खँल्हाबंला जुइगु
भारत भ्रमणय् दीम्ह नेकपा (एमाले)या अध्यक्ष झलनाथ खनाल व भारतीय प्रधानमन्त्री मनमोहन सिंह दथुइ अन्तत सोमवाः खँल्हाबंला जुइगु जूगु दु । मंगलवाः न्हिनय् १२:१५ बजे वयेकपिं दथुइ खँल्हाबंला जुइगु ज्याझ्वः क्वछीउगु दु ।
छवाः न्ह्य निसें भारत भ्रमणय् दीम्ह खनाल व भारतीय प्रधानमन्त्री सिंह दथुइ वंगु बुधवाः हे खँल्हाबंला जुइगु धाःसां भारतीय प्रमं ई मबीवं निम्ह नेतात दथुइ खँल्हाबंला जुइमफुगु खः । सिंहं ई मबीवं खनालं थःगु छवाःया भारत भ्रमण क्वचायेकाः आइतवाः हे नेपाः लिहांवयेगु पूर्व निर्धारित ज्याझ्वः स्थगित यानादीगु खः ।
भारतीय प्रधानमन्त्री सिंह नापया खँल्हाबंला लिपाः खनाल मंगलवाः हे नेपाः लिहांझायादी । खनाल नापं भारत भ्रमणय् झायादिपिं एमालेया पोलिटब्यूरो दुजः अरुण नेपाल व विदेश विभाग दुजः उदयराज पाण्डे धाःसा सोमवाः हे येँय् लिहांवःगु दु ।
भारत भ्रमणया झ्वलय् खनालं अनया थीथी राजनीति दलया नेतात, बुद्धिजिवि, पत्रकार नापं नेपाःमित नाप खँल्हाबंला यानादीगु खः । खँल्हाबंलाया झ्वलय् वयेकलं नेपाःया शान्ति प्रकृया व संविधान निर्माण यायेगु ज्या बारे जानकारी बियादीगु खः ।
