धितालया नां सर्वसम्मतं स्वीकृत

व्यवस्थापिक संसद अन्तर्गत संसदीय सुनुवाई विषेश समितिं सरकार पाखें दक्षिण अफ्रिकाया निंतिं राजदूतय् सिफारिस याम्ह अरुण प्रसाद धितालया नां सर्वसम्मतं स्वीकृत याःगु दु ।

राजदूतय् सिफारिस धितालया नांमय् संसदीय विशेष समितिलय् छगू नं उजुरी मलायेवं सोमावाः सुथय् समितिया बैठकं धितालयात राजदूतया निंतिं सर्वसम्मतं स्वीकृत याःगु खः । थःगु नां स्वीकृत जुइवं धितालं निगू देय्या स्वापू बांलाकेगु व निगू देय् दथुइ रोजगारीया व्यवस्था यायेगु कनादिल ।

अथेहे सरकारं बेलायतया निंतिं सिफारिस याम्ह सुरेश चालिसे व इजिप्तया निंतिं सिफारिस याम्ह श्यामलाल तकदारया सुनुवाइ मंगलवाः जुइगु जूगु दु । वयेक निम्हया नांमय् नं आः तक छगू नं उजूरी लाःगू मदुनी ।