लडाकू व ल्वाभः व्यवस्थापन लिपाः जक न्हू संविधान : प्रम
प्रधानमन्त्री माधवकुमार नेपालं अस्थायी शिविरय् दुपिं माओवादीया लडाकू व ल्वाभः व्यवस्थापन मजूतल्ले न्हूगु संविधान निर्माण यायेमफइगु खँ धयादीगु दु । वयेकलं न्हूगु संविधान निर्माण याये न्ह्यः हे माओवादी लडाकूतय् व्यवस्थापन यायेमाःगु खँय् बः बियादिसें थुकीयात राजनीतिक दलत दथुइया सहमतिया आधारय् याकनं समाधन यायेत थः लगे जुयाच्वंगु धयादिल ।
नेपाल टेलिभिजनं आइतवाः येँ 'हेम-सुनील जोखिमपूर्ण टेलिभिजन पत्रकारिता पुरस्कार' लःल्हायेगु ज्याझ्वलय् वयेकलं अस्थायी शिविरय् दुपिं लडाकू व ल्वाभः व्यवस्थापन मजुइकं शान्ति प्रकृया सार्थक निष्कर्षय् थ्यने मफइगु व न्हूगु संविधान नं निर्माण जुइमफइगु धयादिल ।
वयेकलं माओवादीयात आन्दोलनया ज्याझ्वः लितकायेत सरकारय् वयेत इनाप यानादिसें बन्द, हडताल, नाकाबन्दी थंज्याःगु जनतायात दुखः बीगु ज्यां सुया नं हित मयाइगु धयादिल । वयेकलं सरकारय् वये चाहेमजूगु खसाः जिम्मेवार व रचनात्मक प्रतिपक्षया भूमिका निर्वाह यायेत नं इनाप यानादिल ।
