संस्कृत विश्वविद्यालयलय् तोडफोड
नेपाल संस्कृत विश्वविद्यालयया केन्द्रीय विद्यापिठ बेलझुण्डी दाङय् आइतवाः न्हिनय् छथ्वः विद्यार्थीया पुचलं तोडफोड यानाब्यूगु दु । तोडफोड जुइ न्ह्यः अन विद्यार्थी व कर्मचारीत दथुइ ल्वापू नं जूगु खः । ल्वापूइ निम्ह घाःपाः जूगु दु ।
थीथी झिंस्वंगू सुत्रीय माग यासें भदौ १ गते निसें आन्दोलनय् कुहांविपं विद्यार्थीतय्सं आइतवाः तोडफोड याःगु खः । तोडफोड पाखें विश्वविद्यालयया ज्याकूया न्ह्याकं व लूखा तज्याःगु खँ विश्वविद्यालयं धाःगु दु ।
विश्वविद्यालय स्वतन्त्र विद्यार्थी युनियनया आह्वानय् जुयाच्वंगु आन्दोलनया झ्वलय् आइतवाः पिंहावःगु जुलुसया झ्वलय् विद्यार्थी व कर्मचारीत दथुइ ल्वापू जूगु खः । ल्वापूइ लानाः क्याम्पसया कर्मचारी मिनबहादुर वली व विद्यार्थी जिवित महर्जन घाःपाः जूगु दु ।
कर्मचारीतय्सं विद्यार्थीया आन्दोलन दबे यायेत स्वयेवं ल्वापू जूगु खँ विश्वविद्यालयया स्ववियूं धाःगु दुसाः विश्वविद्यालय प्रशासनं आन्दोलनं उग्र रुप काःगुलिं सोमवाः निसें अन ज्या यायेमफइगु खँ धाःगु दु ।
विश्वविद्यालय् एमएड व बिएएमएस संचालन यायेमाःगु, पूरक परीक्षाया व्यवस्था जुइमाःगु, छात्रावासया व्यवस्था जुइमाःगु लगायत माग यासें निलाः न्ह्यः निसें विद्यार्थीतय्सं आन्दोलन यानावयाच्वंगु दु ।
