छुं ईया निंतिं अग्राधिकार: डा. बाबुराम
येँ (सन्ध्या टाइम्स)/एनेकपा (माओवादी) या न्वकु डा. बाबुराम भट्टराईनं थीथी प्रदेशय् अन हे बसोबास याइपिं जातियात छुं दँ तक अग्राधिकार बीमाःगु बिचाः प्वंकादीगु दु। 'लिपा अग्राधिकार माली मखु व स्वेच्छां उकियात चीकेगु जुइ।' वय्कलं धयादिल ।
म्हिगः नेवाः राष्ट्रिय मुक्ति मोर्चां याःगु 'नेवाः स्वायत्त गणराज्यया विशेषता व स्वरुप' विषयय् न्ववासें थ्व खँ धयादीगु खः।
नेवाःत नेपाःया दकलय् उन्नत जाति जूगु कारणं आः नेपालय् जुइगु आर्थिक क्रान्तिया नेतृत्व नेवाःतय्सं हे यायेमाःगु बिचाः नं वय्कलं प्वंकादिल ।
नेवाः देय् दबूया संरक्षक मल्ल के. सुन्दरं ताम्सालिङ प्रदेशं घेरे जुयाच्वंगु नेवाः प्रदेश नेवाःतय्त स्वीकार्य मजुइगु खँ कनादिल।
नेपाली कांग्रेसया नरहरि आचार्यं केन्याया बाराक ओबामा अमेरिकाया राष्ट्रपति जुइफुसा थः नेवाः प्रदेशया मुख्य मन्त्री जुइ दइ लाकि दइ मखु धकाः न्ह्यसः तयादिल। ताम्सालिङ नेपाल राष्ट्रिय दलया अध्यक्ष परशु राम तामाङं आः नं थीथी लागाय् अनया आदिवासीया बाहुल्यता दनिगु जूगुलिं प्रदेश छुटे यायेत समस्या मदु धयादिल ।
ज्याझ्वलय् पद्मरत्न तुलाधर, हिसिला यमि, लक्ष्मण राजवंशी, लोकेन्द्र बिष्टपिंसं नं नेवाः प्रदेश व संघीय नेपाःया स्वरुप बारे बिचाः प्वंकादीगु खः ।
