बजेट पारित याकेत छन्हु सदन चले याकीगु
येँ (सन्ध्या टाइम्स)/बजेट पारित यायेगु ज्या याके बीत छन्हुया लागिं जक जूसां संसद चले याकेगु संकेत एनेकपा (माओवादीं) बिउगु दु। थौं सुथय् वीरगंजय् रिपोर्टर्स क्लबपाखें याःगु पत्रकार सम्मेलनय् न्ववासें अध्यक्ष पुष्पकमल दाहाल 'प्रचण्डं' थ्व खँ कनादीगु खः ।
बजेट पारित मजुल धाःसा मुलुकया सञ्चालन हे ठप्प जुइगु जुल धइगु खँ वःगुलिं उकियात सहज यायेत जक थःपिंसं छन्हुया लागिं संसद चले याके बीगु धासें तर थःपिंसं लचक जुयाः यानागु थ्व ज्यायात थःपिनिगु विजय खः धकाः सत्तारुढ पार्टीतय्सं मथुइकेत नं वय्कलं इनाप यानादिल ।
उगु ज्याझ्वलय् नेपाः वयाच्वंम्ह भारतीय गृह सचिव जेपी पिल्लेइं नेपाः व भारतया माओवादी दथुइ स्वापू दयेमाः धकाः न्ववाःगु खँयात नं खण्डन यासें प्रचण्डं न्हापा जनयुद्धकालय् भारतीय माओवादीलिसे स्वापू दुगु खःसां आः स्वापू मदु धकाः स्पष्ट यानादिल ।
