परिषद स्वन
यल (सन्ध्या टाइम्स)/परियत्ति केन्द्र मुनि विहार ख्वपया ब्वंमिपिंत शैक्षिक भ्रमण अन्तर्गत थीथी विहारया अवलोकन याकेगु ज्या क्वचाःगु दु ।
मैत्रय युवा संघ, युवा बौद्ध पुचः व मुनि विहारया मंकाः ग्वसालय् जूगु भ्रमणया झ्वलय् आनन्दकुटी विहार, किन्डोल विहारया नापं स्वयम्भू महाचैत्यया भ्रमण याकूगु खः ।
अवलोकनया झ्वलय् आनन्दकुटी विहारय् म्हसिका ज्याझ्वः नं जूगु खः। युवा बौद्ध पुचःया धर्मरत्न शाक्यं लसकुस यानाः न्ह्याःगु ज्याझ्वलय् ख्वपया बौद्ध विद्धान रत्नसुन्दर शाक्यं विहारया म्हसिका न्ह्यब्वयादीगु खः ।
संघ उपनायक भिक्षु कुमार कश्यप, महास्थवीरया मूपाहां सुइ जूगु ज्याझ्वलय् प्रशिक्षकपाखें रेणु त्वाय्नां परियत्ति शिक्षाय् शैक्षिक भ्रमणया महत्वयात कयाः ध्वाथुइकादीगु खः ।
संघ उपनायक भिक्षु कुमार कश्यपपाखें पञ्चशील प्राथना सहित धर्मोपदेश बियाः न्ह्याःगु ज्याझ्वः मैत्रय युवा संघया तीर्थराज वज्राचार्यया सभापतित्वय् जूगु खः ।
