छवाःया नेप्से १८ अंकं थहां वन
येँ (सन्ध्या टाइम्स)/नेपाल स्टक एक्सचेन्जय् जूगु शेयर कारोबारं थ्व वालय् नेप्से परिसुचक समग्र १७ दशमलव ५८ अंकं थहां वंगु दु। वाःया न्हापांगु न्हि ५६७ दशमलव शुन्य ६ अंकं शुरु जूगु नेप्से कारोबार वाःया लिपांगु न्हि ५८४ दशमलव ६४ अंकय् थ्यंकाः बन्द जूगु खः ।
थ्व वालय् वंगु छवाः न्ह्यःया ल्याखय् कारोबार कुहां वःगु दु। कारोबार संख्या कुहां वःसां दांया ल्याखय् धाःसा वंगु छवाः न्ह्यःया कारोबारय् स्वयां थहां वंगु दु। थ्व वालय् नेप्सेय् चय्खुगू कम्पनीया ४४०६ कारोबारं न्यागू लाख चय्खुद्वः व सछि कित्तापाखें स्वीनिगू करोड ख्वीच्यागू लाख चयगुद्वः तका दांया कारोबार जुल ।
वंगु वालय् नं चय्खुगू हे कम्पनीया ४५४४ कारोबारं नीन्हय्गू करोड ख्वीस्वंगू लाख न्यय्खुद्वः तका दांया बराबरया प्यंगू लाख ग्वीनिद्वः व स्वसः कित्ता शेयर न्याये-मी जुल ।
अथे हे 'क' वर्गय् लाःगु कम्पनीया कारोबार मापन याइगु सेन्सेटिभ नं थ्व वालय् ५ दशमलव २८ अंकं थहां वंगु दु। सेन्सेटिभ १४१ दशमलव शुन्य ४ अंकं कारोबार शुरु जूगु खः ।
'क' वर्गया कम्पनीया जक थ्व वालय् नीछगू करोड ग्वीखुगू लाख तका दांया कारोबार जुल। थ्व नेप्सेय् जूगु कूल कारोबारया ६७ दशमलव १९ प्रतिशत खः ।
थ्व वालय् दांया ल्याखं च्यागू करोड न्यय्नीगू लाख तका दांया कारोबार याःगु लिधंसाय् लक्ष्मी बैंक छगू लाख खुद्वः कित्ता शेयर कारोबार याःगु लिधंसाय् नेपाल शेयर मार्केटस् एण्ड फाइनान्स व दकलय् अप्वः ६१० गू कारोबार याःगु लिधिंसाय् भिवोर विकास बैंक दकलय् न्ह्यःने लाःगु दु ।
थ्व वालय् नेपाल स्टक एक्सचेन्जय् प्रभु फाइनान्स लिमिटेडया च्यागू लाख कित्ता हकप्रद शेयर सुचीकृत जूगु दु ।
