'संविधानसभा भंग यायेगु प्रस्ताव वःगु खः'
सत्ता नेतृत्व यानाच्वंगु नेकपा (एमाले)या उपाध्यक्ष अशोक राईं नेपाली कांग्रेसया छुं नेतात पाखें संविधानसभा भंग यायेगु प्रस्तवाः वाःगु खुलाशा यानादिल । वयेकलं संविधानसभा भंग यानाः संविधान आयोग मार्फत न्हूगु संविधान निर्माण यायेगु प्रस्ताव याःगु व अज्याःगु प्रस्तावयात एमालेया पार्टी नेतृत्वं तत्काल अस्वीकार याःगु धयादिल ।
आइतवाः एमाले संचार इलाका अधिवेशनया उल्लेज्या यानादिसें वयेकलं संविधानसभा भंग यायेगु षड्यन्त्र जुयाच्वंगु धयादिल । 'आः संविधान निर्माण जुसाः माओवादी अनुकुल जुइगु व अज्याःगु संविधान निमार्ण यायेमज्यू । उकीया निंतिं संविधानसभा भंग यानाः संविधान आयोग दयेकाः संविधान घोषणा याये' धकाः कांग्रेसया नेतात पाखें प्रस्ताव वःगु दाबी यानादिल ।
वयेकलं छुं नेतात पाखें संविधान निर्माण मजुसाः मजुइब्यू धकाः वयाच्वंगु धापू संविधान सभा भंग यायेगु व संविधान निर्माणय् विपक्षय् दुपिं पाखें वयाच्वंगु छगू कथंया डिजाइन पाखें प्रेरित जूगु धयादिल ।
एमाले उपाध्यक्ष राईं माओवादीया उग्रवाद व मेमेगू दलया नेतातय् कारणं देश भयावह जटिलता पाखे उन्मुख जूगु धयादिल । वयेकलं संयुक्त राष्ट्रसंघया महासचिव वान की मुनया अभिव्यक्ति प्रति सत्ता गठबन्धन दलतय्सं आपत्ती प्वंकूगु निर्णय प्रति नं विरोध प्वंकादिल ।
