दुर्घटनाय् निम्ह सिवं पोखरा तनावग्रस्त
पोखराया सभागृहचोकय् आइतवाः सुथय् जूगु दुर्घटनाय् निम्ह विद्यार्थी सिवं पोखरा तनावग्रस्त जूगु दु । आइतवाः सुथयय् सभागृहचोकय् छगः ट्रकं न्यूरोड स्थित लक्ष्मी आवसीय उच्च माविलय् ब्वनाच्वंपिं विकास गुरुङ व पर्वत गुरुङयात ठक्कर ब्यूगु खः । ठक्कर बिवं निम्हं घटनास्थलय् सिगू खः । ना. १३. ख. ४२८७ नम्बरया मोटरसाइकलय् पृथ्वीचोकं कजेज पाखे वनाच्वंपिं विद्यार्थीतय्त लु. १. ख. ५७५३ नम्बरया ट्रकं ठक्कर नकूगु खः ।
घटना जुइवं सिपिं ब्वनाच्वंगु कलेजया सहकर्मीतय्सं घटनाया विरोध यासें प्रदर्शन याःगु खः । आक्रोशित विद्यार्थीतय्सं सतकय् दुगु सावरीसाधन व पसलय् तकं अप्पां क्येकेवं प्रहरीं स्थिति नियन्त्रणय् कायेत अश्रु ग्याँस क्येकेमाःगु खः । विद्यार्थीतय्सं नगरपालिका न्ह्यने टायर च्यकाः प्रदर्शन याःगु खसाः लिपाः प्रहरीं उकीयात नियन्त्रणय् काःगु खः ।
प्रदर्शन सामान्य जुसां पोखराया बजाः दक्वं बन्द जूगु दुसाः यातायात नं ठप्प जूगु दु ।
