'स्वायत राज्य जक मखु, स्वायत सरकार नं घोषणा यायेगु जुइ'
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' सरकार थःपिनिगु मागय् गम्भीर मजुसाः मेगू चरणया आन्दोलनय् राज्य जक मखु, स्वायत सरकार तकं घोषणा यायेगु ख्याच्वः बियादीगु दु ।
माओवादी निकट मधेशी राष्ट्रि मुक्ति मोर्चा (क्रान्तिकारी)या राष्ट्रिय सम्मेलनया शनिवाः वीरगञ्जय् उल्लेज्या यानादिसें वयेकलं स्वायत गणराज्या घोषणा यायेगु ज्याझ्वः सुयांगु दवावय् वयाः स्थगित यानाःगु मखसें तयारीया आभावया कारणं स्थगित यायेमाःगु स्पष्ट यानादिल ।
आन्दोलनयात सेना छ्यलाः नियन्त्रण यायेगु खँ छुं मन्त्री व नेतात पाखें वयाच्वंगु धयादिसें माओवादी अध्यक्ष प्रचण्डं आन्दोलनयात दमन यासाः सरकारं कल्पना हे मयाःगु स्थिति वइगु धयादिल ।
वयेकलं न्हापा संघीयताया विरोध याइपिंसं आः सरकारया नेतृत्व यानाच्वंगु खँ तसकं विडम्बनावूर्ण जूगु धयादिसें अज्याःगु सरकारयात छुं मधेशी दलतय्सं ग्वाहालि यानाः सत्ताय् च्वनाच्वंगु प्रति नं दुखः प्वंकादिल । वयेकलं समावेशी विधेयकया तकं विरोध याइपिंसं सरकारया नेतृत्व यानाच्वंगु खँ मधेशी दलतय्सं थुइकेमाःगु धयादिल ।
संयुक्त राष्ट्र संघया महासचिवं नेपाःया बारे छुं ई न्ह्यः बियादीगु प्रतिक्रिया यात सत्ता गठबन्धन दलतय्सं विरोध यायेगुया छुं अर्थ मदुगु धयादिल । वयेकलं दक्वं देय्या मंकाः संगठनया धापूयात हस्तक्षेप खंकीपिं राजनीतिक दलत मेगू वाह्य शक्तिं सरकर हिलेगु कासाय् लगेजूगु ईलय् तकं सुम्क च्वंगु खँ पाखें वर्तमान सरकार लाचार जूगु स्पष्ट जूगु दाबी यानादिल ।
