राष्ट्रसंघ व अनमिन माओवादी पाखें प्रभावित : पौडेल
नेपाली कांग्रेस संसदीय दलया नेता रामचन्द्र पौडेलं राष्ट्रसंघ व राष्ट्रसंघीय मिसन अनमिन माओवादी पाखें प्रभावित जूयाः अर्ती उपदेश बियाच्वंगु द्वपं बियादीगु दु ।
शनिवाः येँ जूगु छगू ज्याझ्वलय् न्ववानादिसें वयेकलं माओवादी चाहाना कथं सरकार निर्माणय् राष्ट्रसंघं बः ब्यूगुलिं वया भूमिकाय् आशंका ब्वलंगु धयादिल । वयेकलं राष्ट्रसंघ व अनमिनं तय जू कथं दायित्व निर्वाह यायेगु खः उपदेश बीगु मखु धयादिल ।
नेता पौडेलं नेपाःया दलतय्सं लोकतान्त्रिक ढंगं गज्याःगु सरकार गठन यायेगु खः धकाः थम्हं हे फौसला याइगु धयादिसें राष्ट्रसंघ, अनमिन वा विदेशीयात इनाप वा निर्देशन बीगु अधिकार मदुगु दाबी यानादिल । वेकलं अनमिनयात माओवादी पाखें प्रभावित मजुइत नं इनाप यानादिल ।
अथेहे वयेकलं वर्तमान सरकार परिवर्तन मजुइगु स्पष्ट यानादिसें दक्वं दल संविधान निर्माण यायेगु ज्याय् केन्द्रीत जुइमाःगु बिचाः प्वंकादिल । वयेकलं थ्व सरकार निर्माण यायेगु ई मखसें संविधान निर्माण यायेगु ई जूगु धयादिल ।
