आन्तरिक मामिलाय् हस्तक्षेप यानाःगु मदु : राष्ट्रसंघ
संयुक्त राष्ट्रसंघं नेपाःया आन्तरिक मामिलाय् हस्तक्षेप मयानाःगु स्पष्ट याःगु दु ।
राष्ट्रसंघया प्रवक्ता मिशेल मोन्टासं नेपाःया सत्ता गठबन्धन दलं महासचिव बान कि मुनया प्रतिवेदनं नेपाःया आन्तरिक मामिलाय् हस्तक्षेप जूगु धकाः याःगु निर्णय प्रति टिप्पणी यानादिसें महासचिव मुनं शान्ति प्रकृयाया सफलताया निंतिं नेपाःया राजनीतिक पार्टी दथुइ आम सहमति जुइमाःगु खँय् जक बः ब्यूगु धयादिल ।
न्यूयोर्कय् पत्रकारत लिसे खँल्हाबंला यानादिसें वयेकलं महासचिवया प्रतिवेदनय् नेपाःया हे राजनीतिक दलतय्सं धयाच्वंथे राष्ट्रिय सहमतिया सरकार गठन यायेत प्रोत्साहित जुइमाः धकाः उगु खँ न्ह्यथंगु धयादिसें थुकीं हस्तक्षेपया मजूगु दाबी यानादिल ।
थ्वस्वयां न्ह्यः राष्ट्रया महासचिव बान की मुनं सुरक्षा परिषदया बैठकय् नेपालय् राष्ट्रिय सहमतिया सरकार गठन जुसाः शान्ति प्रकृयायात ग्वाहालि जुइगु धकाः प्रतिवेदन पेश यानादीगु खः । उगु प्रतिवेदनं नेपाःया आन्तरिक मामिलाय् हस्तक्षेप जूगु निर्णय नेपाःयात सत्ता गठबन्धन दलतय्सं याःगु खः ।
अथेहे अनिमन प्रमुख करिन ल्यानग्रेनं शुक्रवाः बहनी सुरक्षा परिषदया बैठकय् प्रतिवेद पेश यानादिसें नेपाःया शान्ति प्रकृयाय् तसकं म्हो जक प्रगति जूगु खँ धयादीगु दु । राष्ट्रपति डा. रामवरण यादवं प्रधानसेनापतियात थमौति बीत ल्ह्वंगु पलाः लिपाः माओवादी सरकारं पिहांवनेधुंकाः राजनीतिक गतिरोध अप्वयावंगु खँ न्ह्यथंनातःगु दु ।
वयेकलं नेपाःया राजनीतिक दलत दथुइ सहमतिया कुतः जुयाच्वंसां राजनीतिक दलत दथुइ खनेदुगु असमझदारीया कारणं शान्ति प्रकृयाय् प्रगति मजूगु धयादिल ।
